Ulqin, Katërkollë, Krajë, Tuz-3l dhjetor 2ool-Nëpër të gjitha viset tona etnike shqiptare në Mal të Zi mbretëron atmosferë shumë e hareshme. Njerëzit duket se i kanë harruar të gjitha brengat e përditshme  të cilat i kanë rënduar gjatë gjithë vitit. Kanë vendosur që natën e sontme më të gjatë të vitit të gëzohen edhe shkëmbejnë urimet më të bukura me më të afërmit e tyre, dashamirët dhe mysafirët. Tryezat i kanë të mbushura me të gjitha, siç thotë populli, të mirat.

Urimet më të bukura në familjet tuaja.(Intron)

Në foto:Pamje nga viset tona..

 Në Ulqin, por edhe në të gjitha qendrat tona deri në Rozhajë, duken vetëm fytyra të qeshura, të gëzuara. Shumica kanë vendosur që të festojnë në gjirin familjar. Mirëpo, pritja e Vitit të Ri është organizuar edhe në shumë lokale hoteliere. Në Ulqin në hotelin “Albatros”, në Qendrën turistike “Hollegro”, në vilat në Kala, në  Anë të Malit në motelin “ Diamant”, në Krajë në motelin “Rumija”, kurse nga Malësia na njoftojnë se pritja e Vitit të Ri do të bëhet në qendër të Tuzit, ku do të marrin pjesë këngëtarët më të mirë të trevës.

Ata që festojnë në gjirin familjar po ndjekin programet e pasura televizive si dhe programin special të Radio-Ulqinit. 

             500 x 375

500 x 375

 Ulqin, 3o dhjetor- Radio- Ulqini, ky medium i vetëm elektronik lokal, ka paralajmëruar se për  natën e  Vitit të Ri organizon program të posaçëm argëtues. Dëgjuesit, kudo që ndodhen, në Ulqin apo diasporë  do të kenë mundësi ta ndjekin këtë program, i cili do të zgjasë deri në orët e mëngjesit të 1 janarit.

 Lajmërohen të gjithë mërgimtarët se programin e Radio-Ulqinit, Intron do t`ju  mundësojë ta dëgjoni edhe nëpërmjet Internetit.gjithashtu mundeni të merni pjes nepermjet emailit te radio ulqinit në email Radioul-Regjia@cg.yu (Intron) 

Ulqin, 3o dhjetor-Shumica e banorëve të Ulqinit, të Anës së Malit dhe Krajës kanë vendosur që Vitin e Ri ta presin në gjirin familjar. Në bisedë me  disa të rinj mësojmë se, siç thonë ata, me mirë është të kremtosh me mundësitë që ke në gjirin familjar. Janë bërë shumë organizime nëpër lokale, hotele e restorante, paralajmërohen se do të marrin pjesë këngëtarë shqiptarë nga Mali i Zi dhe Shqipëria, por duke u mbështetur në përvojat e vitit të kaluar, këngëtarët e preferuar kanë shërbyer vetëm si reklamë për të tërhequr mysafirët. Janë paralajmëruar se do të këndojnë në Ulqin, por ata Natën e Vitit të Ri kanë qenë në vende të tjera.

Nuk është e thënë se kështu nuk mund të ndodh edhe sivjet.

-Personalisht do të qëndroj në shtëpinë time. Jemi një grup shokësh  dhe shoqesh edhe shpresoj se do të kemi atmosferë të mrekullueshme, tipike të kësaj nate të hareshme.
 

 Konsideroj se nuk ia vlen për të paguar loo marka në restorante e lokale të ngjashme, mbase atje nuk mund ta pish asnjë lëng të vetëm.- shprehet Emiri.

Ndërkaq, një moshatar i tij ankohet se nuk ka mundësi që të rezervojë vend në lokale, ku organizohet pritja e Vitit të Ri. Mirëpo, shpresoj të kalojmë bukur sepse një shok imi ka ditëlindjen edhe na ka ftuar që të jemi mysafirë të tij. Do të kemi muzikë të zgjedhur edhe shpresoj se do ta kemi atmosferën për mrekulli,-thotë Muki.

-E kam një ofertë për të shkuar në restorant, por më mirë në rrethin familjar. I dashuri im ndodhet në mërgim edhe do të kem raste të tjera për të pritur Vitin e Ri në lokale. Të dashurit tim ia kam dërguar urimin me celular. Edhe ai mua. Kaq edhe dëshiroj të jem anonime. Por, të gjithë lexuesve të kësaj faqeje u dërgoj urimet më të bukura. Gëzuar.(Intron)

Ulqin, 3o dhjetor-Më parë ka qenë traditë, që, në vigjile të Vitit të Ri të paraqitet nëpër qytet edhe Babadimëri, i shoqëruar me «kolegë», duke krijuar atmosferë të hareshme edhe duke u shpërndarë fëmijëve dhurata rasti. Kësaj radhe deri ditën e sotme «nuk erdh» plaku i dimrit.

 Të shohim nesër, se mbase është vonuar diku udhës!
Përballë kësaj, fëmijët duket se janë «armatosur» mirë me fishkezjarre dhe do të jenë gati për të shënuar ardhjenne Vitit të Ri.(Intron)

Ulqin, 3o dhjetor-Rrallë mbahet në mend që të jenë konsumuar kaq shumë vezët me rastin e një feste, madje as fetare. Të thuash, të gjithë konsumatorët që dalin nga dera e tregut, patjetër në trastet e tyre kanë vezë. Konsumatorët thonë se, këto ditë vezët janë artikulli më i kërkuar.

 Veprojnë në këtë mënyrë që të përgatisin ëmbëlsira, por edhe vezët duket se zënë vend shumë të rëndësishëm në listën e kuzhinës. Vezët, të shumtën, janë të fermave, e shumë të rralla nga fshati. Këto të fundi kushtojnë dy vezë 1 markë, kurse ato “kultivuara”, pesë kokërra l DM.(Intron)

Ulqin, 3o dhjetor-Vargu i albumeve të kënëtarëve tanë është duke u shtuar gjithnjë. Në këtë kuadër duhet përmendur edhe paraqitjen e parë të ansamblit “Ligatura”, të cilën e përbëjnë veteranë të muzikës së Ulqinit, i cili kultivon një melos të vjetër, specifik, qytetar dhe muzikë të komponuar nga profesori i muzikës, Hajdar Axhemi me tekste të Asllan Bishës, Emin Halilit dhe Haxhi Shabanit.

 Orkestrimin e ka bërë Islam Axhemi.

Ky lloj i melosit sigurisht ka për të tërhequr ardhuruesit e vet, sepse fjala është për një grup i cili ka një traditë të gjatë që është i pranishëm në manifestime më reprezentative të Ulqinit.(Intron)

Ulqin, 28 dhjetor-Kryetari i Komunës së Ulqinit, Skënder Hoxha organizoi sot një takim, në të cilin merrnin pjesë përfaqësuesit e klubeve të partive të cilat participojnë në Kuvendin Komunal, përfaqësues të ndërmarrjeve, shoqatave joqeveritare, gazetarë etj.

Kryetari Hoxha këtë vit e vlerësoi si shumë karakteristik, duke theksuar se parlamenti vendor ka marrë një serë vendimesh e këtu cilësoi atë për refuzimin e pjesëmarrjes së Ulqinit në sistemin unik të ujësjellësit rajonal të bregdetit të Malit të Zi, sepse siç tha ai, Ulqini ka sasira të mjaftueshme të ujit të pishëm. Ai theksoi se një asociacion ndërkombëtar do të investojë në hapjen e ll puseve të reja në rajonin e Anës së Malit.

 Këto kapacitete Ulqinit do t i  sigurojnë sasira të ujit për më shumë se loo mijë veta. Në kontekstin e investimeve të jashtme përmendi edhe projektin e “Planit master” me realizimin e të cilit parashihet të ngriten 5o nijë shtretër në Plazh të Madh. Ky vit është karakterizua edhe me disa afera financiare. Në të vërtetë, sipërfaqe të eksproprijuara tash l5 e 2o më heret, pronarët e sipërfaqeve të nacionalizuara kërkojnë kompenzim nga komuna e Ulqinit. Pastaj buxhetin e komunës e ka renduar tej mase vendimi gjyqësor të të ashtuquajturës afera e mushkajave.

Kryetari  Hoxha  tha se një vemendje të pasaçme duhet t ia kushtojmë turizmit. Qysh tash ia kemi nisur të bëjmë përgatitjet e duhura për vitin 2oo2. Dihet mirëfilli se turizmi është dega më me përparësi e ekonomisë së Ulqinit. Ai u bëri ftesë të gjithë qytetarëve e ne veçanti klubeve të këshilltarëve të të gjitha partive politike që të bëjnë angazhime maksimale në fushën e përgatitjeve për stinën e ardhshme turistike. Ai tha se ka paralajmërime se do të arrijnë mysafirë të shumtë nga bota.

Kryetari i Ulqinit paralajmëroi se për një afat të shkurtër do të përfundojë edhe bulevardi në drejtim të Plazhit të Madh, si dhe do të vazhdojë asfaltimi i disa rrugëve lokale nëpër fshatra në mënyrë që atje të krijojmë kushte normale jetese.(Intron)

Ulqin, 28 dhjetor- Pas më shumë se nëntë vitesh, në stacionin hekurudhor të Bajzës sot ka mbërritur një tren nga Mali i Zi, duke shënuar kështu komunikimin e Shqipërisë me vendet e tjera të rajonit edhe nëpëmjet linjës hekurudhore.

Në foto:Pika kufitare Bozhaj-Hani i Hotit

  Me këtë rast ishte i pranishëm edhe kryeministri shqiptar, Ilir Meta, i cili u bëri ftesë biznesmenëve shqiptarë që të ushtrojnë profesionin e tyre pasi Shqipëria u lidh me Evropën. Meta tha se qeveria shqiptare është e angazhuar që të modernizojë edhe më tej sistemin hekurudhor që të ketë lidhje sa më të mira me vendet e tjera.

Nga pala malazeze merrte pjesë zëvendësministri i Komunikacionit, Millan Gjokoviq, i cili tha se rivenia e lidhjes hekurudhore midis Malit të  Zi e Shqipërisë është një dëshmi e marrëdhenieve të mira mes këtyre dy vendeve.(Intron)

  Ulqin, 28 dhjetor-Edhe këtu janë bërë përgatitje për pritjen e Vitit të Ri. Qyteti është dekoruar për herë të parë me “vargje” neoni, por edhe vitrinat e dyqaneve janë përpjekur që t u japin një festive lokaleve të tyre, ndonëse tejet modeste. Pritjen e  natës më të gjatë të viti e organizojnë hoteli “Albatros”, qendra turistike-hoteliere “Hollegro”, vilat në Kala. Në këto të fundit mysafirët do të jenë nga Shqipëria.

Elektroekonomia e Malit të Zi ka lajmëruar se gjatë festës së Vitit të Ri nuk do të ketë reduktime të rrymës elektrike.(Intron)

Ulqin, 27 dhjetor-Nga data 1 janar të vitit 2oo2 edhe në Mal të Zi monetë zyrtare do të jetë evro. Mirëpo, në debatin e sotëm në Kuvendin e Malit të Zi deputetët e grupimit politik opozitar profederatës kanë kritikuar pushtetin malazias për gjendjen e rëndë ekonomike edhe një javë para aplikimit të evros është ngritur çmimi i karburantëve të naftës. Ky blok opozitar proserb e ka vlerësuar shumë të rëndë gjendjen ekonomike, sepse ëmimi minimal i punës është vetëm 8o marka, kurse për vitin 2oo2, nga l janari është premtuar se ky çmim do të ngritet në 9o marka. Mirëpo, përballë kësaj situate, disa drejtorë të firmave të ardhurat mujore i kanë edhe mbi lo mijë marka!

 Ngritja e çmimit të karburantëve do të kushtëzojë edhe shtrenjtimin e artikujve më vitalë ushqimorë. Ata kërkuan që të rikthehet dinari. Këtë e ka kërkuar, sië shkruan shtypi ditor i Podgoricës, edhe Predrag Drecun, anëtar i grupit të ekseprtëve serbë nga kolaicioni profederatës nga Mali i Zi.

Të gjitha këto përplasje politike tash sa kohë bien mbi supet e qytetarëve të cilët me shumë vështirësi e sigurojnë mbijetesën.(Intron)

Ulqin, 27 dhjetor - Art Club me seli në Ulqin, nesër, më 28 dhjetor e ka ditën zyrtare të themelimit. Mbushen plotë ll vjet që kur doli në skenë kjo shoqatë e intelektualëve dhe krijuesve shqiptarë me seli në Ulqin. Atë e kanë themeluar Ibrahim Berjashi, Rudi Goga, Basri Çapriqi, Asllan Bisha, Qazim Muja, Haxhi Shabani etj. që sot e zgjaruar anëtarësinë dhe është bërë prezentuese e denjë e kulturës shqiptare, jo vetëm në Ulqin. Sivjet ky përvjetor u shënua me një konferencë shtypi edhe me ndarjen e çmimit tradicional, të cilin juria ia ndau pas vdekjes prof. Bajram Rexhës.

Drejtori aktual i Art Club-it, Dr. Nail Draga tha se ky vit dallohet  nga vitetet e kaluara sepse gama e veprimtarive të klubit u zgjerua edhe për një veprimtari tjetër  të rëndësishme kulturore, e ky është Panairi i librit, “Ulqini 2ool”, i cili u mbajt në qytetin e Ulqinit nga data 8 deri më l2 gusht 2ool. Në këtë panair të parë të librit shqip në Ulqinin e lashtë morën pjesë botues  nga Mali i Zi, Shqipëria, Kosova e Maqedonia, si dhe nga diaspora.

 Ky prezentim i madh i librit u bë në bashkëorganizim me Lidhjen e Botuesve Shqiptarë dhe Art Club-i dhe është mbështetur materialisht nga Kuvendi komunal i Ulqinit dhe Ministria e Kulturës në Qeverinë e Malit të Zi, ndërsa i gjithë manifestimi ka qenën nën patronatin e Ministrisë së Grupeve Nacionale dhe Etnike në qeverinë malazeze. Dihet mirëfilli se veprimtaria e Art Club-it përbëhet nga dy fusha të veprimtarisë, organizative dhe botuese. Në vitin 2ool, përveç panairit të librit, janë organizuar edhe një mori manifestimesh të tjera, si ai kushtuar poetit kombëtar Gjergj Fishta (në bashkëpunim me shoqatën “Don Gjon Buzuku”), tryeza e rrumbullakët kushtuar plan-programeve  të lëndëve nga identiteti kombëtar, përurimi i monografisë- “Bajram Rexha-personalitet i arsimit, kulturës dhe i atdhetarizmit“, manifestimi poetik ndërkombëtar “Kalimerja poetike”, përurimi i librit të Mehmet Krajës “Njëzet tregime për kohën e shkuar”, por është zhvilluar edhe një aktivitet i dendur edhe në fushën e botimeve. Kësisoj, me firmën e Art Club-it, sivjet janë botuar titujt” Shtegu i vashës”(poezi) i Lumnie Hoxhës,” Votra ime”(poezi) e Lulash Palushajt, Eelez Osmanaj (studim ekonomiko-fianciar), ”Shpalime gjeografike”(publicistike) Nail Draga, ”Kraja e Shkodrës” (monografi) e  Hajrullah Koliqit, 1 numër i revistes “Lemba” dhe katër numra te revistës për femijë “Zana”. Gjithësej, me firmën e Art Club-it janë botuar 4o tituj. Në shtyp ndodhen edhe dy botime të rëndësishme.
Për organizimin e veprimtarive, Art Club-i është ndihmuar nga Fondacioni kulturor shqiptaro-amerikan në Nju-Jork, Instituti për Shoqëri të Hapur në Podgoricë, Qeveria e Malit të Zi dhe donatorë të ndryshëm.(Intron)

 Ulqin, 27 dhjetor-Burimet e informacionit bëjnë të ditur se në aksin rrugor Rozhajë-Kullë-Pejë kalohet pa pengesa. Ekipet e ndërmarrjes së rrugëve kanë marrë masa që trafiku të zhvillohet normalisht. Sipas zyrtarëve të policisë së Rozhajës, trafiku në këtë relacion është duke u zhvilluar normalisht. Mirëpo, u rekomandohet shoferëve që automjetet që drejtojnë t  i  kenë të furnizuara me pajime dimërore.

 Ka paralajmërime se për festat e Vitit të Ri nga Kosova do të shkojnë nxënësit, studentët, punonjësit që ndodhen në Kosovë, të të afërmit e tyre në viset etnike shqiptare në Mal të Zi, Ulqin, Krajë, Anë të Malit, Malësi etj. për të festuar në gjirin familjar.(Intron)

Ulqin,26 dhjetor- Kryetari i Shoqatës “Miqtë e Kalasë”, Ismet Karamanaga  nga Ulqini u shpërndau sot mediave një kërkesë të cilën ia ka dërguar pushtetit lokal të kësaj komune që të radhitet në buxhetin komunal. Sipas tij ky pushtet është i obligueshëm që të bashkëpunojë  me sektorin joqeveritar, i cili po bën angazhime të shumta për të ndihmuar këtë qytet. Duke u bazuar në këto fakte kryetari i këtij asociacioni thotë se  shoqata jonë kërkon që të radhitet në buxhetin komunal. Shoqata “Miqtë e Kalasë”, por as disa tjera  kanë veprimtari të dukshme në interes të Ulqinit, nuk kanë mundur të kenë bashkëpunim të duhur me qeverisjen lokale për shkak se pushteti vendor përherë na ka refuzuar me vend.

 Shoqatat joqeveritare e kanë dëshmuar veten se punojnë në të mirë të këtij qyteti edhe në këtë ndërlidhje  ka për detyrë që  të përkujtojnë pushtetarët, të cilëve iu ka dhënë populli besimin, në realizimin e premtimeve të dhëna. Veprimtaria jonë, konkretisht e Shoqatës “Miqtë e Kalasë” ka të vetmin qëllim, të ndihmojë qytetin e Ulqinit. Që nga themelimi e kemi vërtetuar këtë. Derisa puna jonë mbështetet mbi këto baza, atëherë edhe paratë që i arkëton populli në buxhetin komunal, duhet të na ndahen edhe ne, OJQ-ve.

Përveç “Miqve të Kalasë”, me aktivitetin e tyre  dallohen edhe Art Club-i dhe Shoqata ekologjike “Kalimera”, të cilat zhvillojnë veprimtari  të dendur kulturor e ekologjik. Ato, pa tjetër puna e tyre  duhet të financohet nga buxheti komunal i Ulqinit.

Shoqata “Miqtë e Kalasë” tash disa vite angazhohet për radhitjen e Kalasë së Ulqinit në familjen e trashëgimisë botërore të  UNESKO-s. Ai thotë se  6o mijë markat e miratuara nga Kuvendi i Komunës për riparimin e rrugëve të Kalasë, nuk janë  angazhuar. Nga sa shihet, njeri prej lokaliteteve më të lashta dhe më të bukura të Mesdheut, djep i kulturës dhe i cilivizimit tonë, u është lënë në dorë qytetarëve të këtij vendbanimi karakteristik dhe mëshirës së kohës, apo mbase kohëve të tjera që do të arrijnë pas nesh, për dallim nga pushteti tashëm  i Ulqinit, do ta çmojnë e vlerësojnë më mirë gjithë këtë pasuri të trashëgimisë së cilivizimit tonë mijëvjeçar, thotë kryetari i kësaj shoqate.(Intron)  

Ulqin, 26 dhjetor –Në konferencën e sotme me gazetarë, kryetari i  Shoqata e Artistëve dhe Intelektualëve “Art Club” nga Ulqini, Dr. Nail Draga pasi foli mbi veprimtarinë e kësaj shoqate për këtë vit, ia dha fjalën gazetarit Ali Salaj, që të paraqesë raportin e jurisë lidhur me fituesin e ëmimit të sivjetëm të kësaj shoqate.
 Z. Salaj, theksoi se, juria pasi e shqyrtoi gjithë

 veprimtarinë kulturore për sivjet vendosi që ky çmim  tradicional i sivjetëm t i  ndahet  profesorit të  ndjerë i Gjuhës dhe i Letërsisë Shqipe, Bajram Rexha,  pas vdekjes, duke  thënë se shpërblimi i ndahet për kontributin e dalluar pedagogjiko-arsimor dhe për themelimin e kultivimin e artit skenik në Ulqin. (Intron)

 Podgoricë, 26 dhjetor – Deputeti i Unionit Demokratik të Shqiptarëve, Ferhat Dinosha në seancën e sotme të Kuvendit të Malit të Zi  tha se hapja e pikave kufitare me Shqipërinë do të kishte një rol pozitiv të ngritjes së shkallës së zhvillimit të këtyre viseve kufitare në viset kufitare në Mal të Zi. Ai  përmendi zonat kufitare në komunën e Ulqinit, duke theksuar  trevën e Anës së Malit, sikur të kishte vendkalimin kufitar për në Shkodër, do të ishte në një gjendje tjetër zhvillimi dhe komunikimi. Sepse, siç tha ai, Shkodra do të ishte “ në derë” të shtëpisë së atyre katundeve këndej kufirit, meqë do tu  lypeshin vetëm 2o minuta udhëtim. Shkodra e tashme, vërtet, ka një nivel të ngjashëm të jetës së këtyre fshatrave në komunën e Ulqinit, pra mjedis i pazhvilluar, por  po shihet se Evropa do të arrijë edhe në këto hapësira, që do të thotë se ekzistojnë shpresa se nga kontaktet me Shkodrën do të mund të jetohet më mirë.

 Ndërkaq, lidhja e Shkodrës me Ulqinin, nuk është vetëm në favor të këtyre dy qyteteve fqinje, të banorëve të tyre, por edhe të Malit të Zi. Karshi kësaj, edhe zhvillimi i Malësisë do të arrihej më shpejt nëse Tuzit i  kthehet statusi i komunës. Vërtet se kaherë premtohet nga partia në pushtet, si dhe të një pjese të opozitës, mirëpo qendrës lokale të Malësisë, Tuzit nuk i është kthyer statusi i komunës së posaçme. Kaherë është deponuar kërkesa e partive nacionale shqiptare, por edhe i të gjitha bashkësive lokale të Malësisë, pushteti ende duket i “shurdhër” edhe pse kemi besim të plotë se kjo trevë  me mbi l5 mijë banorë i  plotëson edhe kushtet ekonomike të gëzojë statusin e komunës së pavarur, e jo në kuadër të bashkësisë së komunave të kryeqytetit republikan, Podgoricës, tha Dinosha. (Intron)

Ulqin, 25 dhjetor-Sot, ditën e martë, edhe qytetin e Ulqinit e kishte mbuluar bora, e cila gjatë ditës edhe u shkri në saje të temperaturës deri në lo gradë celzius.Trashësia e saj nuk i kalonte 2 cm, mirëpo është një paralajmërim shumë serioz se verës së gjatë e përcëlluese do  t i “hakmerret“ dimëri me borë e ngrica.

 Përseri të reshurat më të reja të borës e kanë vështirësuar tej mase qarkullimin nga Kraja.(Intron)

Ulqin, 25 dhjetor-Kryetari i Unionit Demokratik të Shqiptarëve, Fuad Nimani ka reaguar sot lidhur me deklaratat e, siç tha ai, të ish-nënkryetarit të partisë, z. Prelë Vulaj dhe ish- u.d. së kryetarit të Degës së UDSH për Malësinë,z. Fran Gojçaj se, sipas z. Nimanit, ata nuk kanë asnjë bazë statutare të përfaqësojnë rrëfimin e pabazë edhe ne sti të tilla i hudhim poshtë.

Përdorimi i mjeteve publike të informacionit për shkak të dezavuisimit të opinionit, para së gjithash të trupit votues të Malësisë, është keqpërdorim i ish- pozitës së funksionarit, duke shkelur rëndë marrëveshjen e arritur mbi braktisjen vullnetare të funksioneve.

Unioni Demokratik i Shqiptarëve, si parti serioze, thekson Nimani me përpikmëri realizon e respekton vendimet e Këshillit Qendror të miratuara në mënyrë demokratike e me vullnetin e shumicës, të cilët kanë qenë të obligueshme edhe për zotërinjtë Vulaj e Gojçaj. Në mënyrë të pargumentuar sulmohet dega e Ulqinit se, gjoja, ka luajtur rolin e tutorit për degën e Malësisë me rastin e plotësimit të resorit ministror në ministrinë për të Drejtat e Popujve Pakicë. Me qëllim të informimit të opinionit të gjerë, e mbi të gjitha të trupit votues në Malësi, duhet të theksojmë se, përkundrazi rekomandimi i degës së Ulqinit lidhur me këtë çështje ka qenë që më mirë do të ishte në këtë rast që t`i vazhdohet mandati ish- ministrit Junçaj për çka një pjesë e degës së Malësisë ka reaguar ashpër, duke mos zgjedhur mënyra dhe metoda që në këtë  funksion të emrohet z. Vulaj.Këtyre qëllimeve dhe veprimeve,
të inspiruar nga interesat personale,
 

 iu është kundërvënë Këshilli Qendror si organ i vetëm kompetent, i cili ka të drejtë statutare për të udhëheq politikën kadrovike, duke mos lejuar që të mos bihet nën ndikimin arbitrar dhe të presioneve të një pjese të degës së Malësisë, që ka të drejtë vetëm të propozojë e në asnjë mënyrë statusin e të  vendosurit. Këshilli Qendror i UDSH duke zbatuar metodat demokratike të votimit të fshehtë edhe  me shumë kandidatë, ka miratuar vendimin që funksionin e minstrit ta marrë z. Gëzim Hajdinaga, ish- ndihmësministër në këtë ministri. KQ i UDSH, duke analizuar mundësitë ka miratuar vendimin që ndihmësministër në Ministrinë e të Drejtave të Grupeve Nacionale dhe Etnike të emrohet z. Prelë Vulaj, i cili e ka refuzuar këtë, duke thënë se kjo ofertë për të është poshtëruese, kurse për Malësinë  nënçmuese, duke harruar se Vulaj e Gojçaj nuk e përfaqësojnë Malësinë. UDSH është parti demokratike, anëtarësim të lirë vullnetar, por ka edhe të drejtë të përjashtimit, nëse nuk zbatohen normat statutare. Deklarata se Malësia e ka humbur besimin ndaj z. Dinosha është e pabazë, paushalle dhe qëllimkeqe, pa sens politik. Për shkak të shkeljes së normave statutare dhe në bazë të vendimit të Këshillit Qendror mbi pushimin e funksionit në UDSH, njoftojmë opinionin se z.Prelë Vulaj dhe z.Fran Gojçaj nuk kanë të drejtë të përfaqësojnë këtë parti në mjetet e informacionit, thuhet në deklaratën për opinion të UDSH, të cilën e ka paraqitur  lideri i Unionit Demokratik të Shqiptarëve, Fuad Nimani.(Intron)

Ulqin, 25 dhjetor –Komisioni  shumëpartiak  i Kuvendit të Komunës së Ulqinit mbajti mbledhjen e vet të katërt edhe në shqytim ka marrë mbështetur nisiativën për ndryshimin e plotësimin emrave të rrugëve dhe të shesheve të këtij qyteti i banuar me shumicë absolute shqiptare. Kryetari I këtij komisioni  Mehmet Bardhi (LD në MZ) njoftoi se  komisioni me këtë rast u bë edhe afatizimi lidhur me këto ndryshime. Të gjithë anëtarët e këtij komisioni, janë të mendimit se emërtimet aktuale në qytetin e Ulqinit duhet të ndërrohen.
Sipas regjistrit të  prezentuar,  të emërtuara janë

 35 rrugë, prej të cilave vetëm tri kanë emrat të shqiptarëve. Të gjithë emrat ekzistues të rrugëve në Ulqin i përkasin një ideologjie të sistemit të kaluar monist, të cilët nuk paraqesin frymën dhe proceset e reja demokratike. Komisioni ka vendosur unanimisht  që rreth këtyre ndërrimeve e plotësimeve të organizojë takime me qytetarë, shoqata dhe individë mendimet e propozimeve të të cilëve mund të jenë të dobishëm, thotë z.Bardhi.(Intron)

Tivar, 24 dhjetor- Arqipeshkvi i Tivarit, monsinjor  Zef Gashi me rastin e Krishtilindjeve besimtarëve të krishterë u dërgoi këtë mesazh:” Festa e Krishtlindjes-Ardhjes së Zotit tonë mes njerëzve  është festë e të gjithë të krishterëve, por do të thoja edhe festë e të gjithë njerëzve vullnetmirë, festë e kretyrave të Zotit. Prania e fjalës së mishëruar mbulon dhe përfshin tërë rruzullin, prandaj prek të gjithë njerëzit.

Prej Krishtilindjes së parë Zoti është me njerëz në mënyrë të posaçme. Zoti ynë është Emanuel-Zoti me ne. ”Po ju sjellim një lajm të gëzueshëm sot mes jush, ne Betlehem u lind Mesia-Shelbuesi”,- thonë engjujt barinjve të Betlehemit në atë natë të madhe, atë natë të shenjtë kur për një moment  u bashkuan qielli e toka në saje të mishërimit të Birit të Zotit.

“Të gjitha viset e botës e panë shëlbimin e Zotit”. Krishtlindja është festë e paqes, mirësisë, manifest paqeje. Krishti Zot e njeri paqedashës. Engjujt këndonin : ”E paqe njerëzve vullnetmirë mbi tokë”.

Mesia është protagonist dhe bartës i paqes  edhe  sipas Izaisë profet: Ai, jo vetëm premton, por edhe zbaton paqen  me veprimtarinë edhe flijimin e jetës së vet. U lind i varfër në shpellë të Betlehemit. Kaloi një jetë me plot vuajtje. Vdes tragjikisht në kryq  dhe kështu  deshmon dhe realizon atë që mëson e predikon, e jo si disa liderë popujsh që për interesat e veta personale, për egoizmin e vet, derdhen gjakun e pafajshëm të shtetasve të vet, si Herodoti mbret.

E, mu për këtë arsye, pra, Krishti qe 2ooo vjet predikohet e nuk harrohet, ndërsa këta zotër të vegjël njerëzor, jo vetëm që po harrohen, por sa po zbresin nga troni i pushtetit për shkak të padrejtësive të bëra, populli po i gjykon dhe po kërkon përgjegjësi nga ata.

Krishtlindja është edhe festë drite :

 Në dyluftim shekullor, mu në fund  fitoi drita- me ardhjen e Krishtit u zhduk terri, shndërriti mbi shpellën e Betlehemit ku u lind Mesia” Dhe u duk një ditë e madhe që shndërriti mbarë krahinën”.
Dita simbolizon dritën  e nata errësirën, por drita hyjnore e Betlehemit e bëri  natën dritë. 
Duke kremtuar festat e Krishtlindjes dëshirojmë që në botë dhe në zemrat e të gjithë njerëzve paqedashës të mbretërojë paqja, mirëqenia dhe të gjitha bekimet e mirësisë Hyjnore.
Për shumë vjet e me zemër të bardhë e të mirë. Urime.- thuhet ndër të tjera në këtë urim të Msgr. Zef Gashi, kryeipeshkëv i Tivarit. (Intron)

Ulqin, 24 dhjetor- Firma private “Gjovani trejd” në bashkëpunim me Kuvendin e Komunës së Ulqinit  në vigjile të festës së Vitit të Ri filloi zbukurimin e qytetit të Ulqinit, me poça elektrikë të ngjyrave të ndryshme.

Kjo është hera e parë që në këtë mënyrë dekorohet ky qytet për festën e Vitit të Ri.  

 Nëse nuk do të ketë reduktime të enegjisë elektrike këto stoli do të kenë gjithësesi bukurinë e vet, e nëse vazhdohet me përkufizime sikundër deri më tash, atëherë do të jetë një dëshirë e pushtetit vendor për të pritur solemnisht festën e motmotit, Vitin e Ri.(Intron)

Ulqin, 24 dhjetor- Stina e dimërit sivjet po tregon se nuk është duke u kursyer as ky qytet bregdetar, tradicionalisht me klimë të butë. Sot në mëngjes malet për rreth ishin të mbuluara me borë, vërtet nuk ka ndonjë trashësi të madhe, por mali i Mozhurit është “ mveshur” me të bardha. Gjatë ditës ka pasur reshje të holla bore edhe në vetë qytetin e Ulqinit. Familjet të cilat nuk kanë siguruar me kohë dru zjarri e kanë vështirë që në shtëpitë e tyre të kenë nxehje.

   Është edhe një karakteristikë tjetër se dyqanet, kafiteritë e punëtoritë tjera të vogla e kanë bërë një rrjet, të ngjashëm me atë të marimangës, me qëllim që edhe në këtë gjendje, duke huazauar energjinë elektrike nga njeri tjetri, të punojnë. Mirëpo, këto lidhje paraqesin rrezik potencial të dëmtimeve të aparateve të ndryshme elektronike.(Intron)

Ulqin, 23 dhjetor-Ulqinakët masovikisht janë orientuar në veprimtari afariste të cilat u sjellin më shumë të ardhura edhe kanë mundësi të të zgjerojnë kapacitetet. Rëndom përcaktohen për lokale turistike-hoteliere , bufe, restorante, kafiteri, por edhe dyqane tregtare. Vërehen madje edhe sallone të tëra të mobileve të importuara që u ofrohen konsumatorëve.

Por, nuk ekzistojnë më disa veprimtari artizanale të  traditës, siç janë teneqepunuesit, rrobaqepës, e ka mbetur vetëm ndonjë këpucëtar, por tepër të moshuar e kjo do të thotë se këto profesione tradicionale nuk janë më atraktivë edhe pse dikur, së bashku me mullinjtë e vajit, ishin veprimtaritë kryesore ekonomike të këtij qyteti. Në treg të këtushëm ndodh të paraqiten eksponate të stilit të vjetër, por janë të ardhur edhe nuk paraqesin motivet e këtij ambienti.

 Më heret janë ofruar të ashtuquajturit “sapunj të bamë”nga vaji i ullirit, të cilët nuk janë përdorur vetëm si mjete të higjienës, por kanë pasur edhe veti shëruese.

Në Ulqin punojnë nja 7-8 furra buke, por vetëm njera ka për pronar një qytetar të komunës së Ulqinit, që të gjithë të tjerët janë të ardhur. Ose, ka mbetur vetëm një farkëtar i vetëm. Kësisoj, artizanatet e dikurshme, siç mund të vërehen në Tivarin e Vjetër, Podgoricë, Shkodër, Gjakovë etj. në Ulqin nuk ekzistojnë më. Nuk ekziston madje as ndonjë program për të nxitur këto veprimtari, të cilat gjithësesi mund të kenë adhuruesit dhe të interesuarit e këtyre shërbimeve.(Intron)

Ulqin, 23 dhjetor-Derisa reduktimet e energjisë elektrike vazahdojnë me nga katër orë, madje ka paralajmërime se kjo gjendje mund të keqësohet edhe më shumë, karshi kësaj, në disa lagje periferike të Ulqinit, që nga aplikimet e përkufizimeve të furnizimit me energji elektrike, nuk fiken dritat publike.

 Kjo me të drejtë iriton qytetarët të cilët me aq dishiplinë u nënshtrohen këtyre masave të kursimit, por nuk mund ta kuptojnë këtë shpenzim të panevojshëm që do të mund të shërbenin që të kenë drita mbase edhe 5o- 6o shtëpi.(Intron)

Ulqin, 23 dhjetor-Buxheti i komunës së Ulqinit sivjet u plaçkit për 24o mijë marka. Kjo ndodhi si pasojë e një kontrate të nënshskruar që në vitin l992 midis Këshillit të atëhershëm Ekzekutiv dhe firmës private “Erlajns travel trejd”, pronari i të cilit është nga Serbia. Atëherë u hetuar që spërkatja e mushkajave nuk bëhet me preparate përkatëse, komuna e Ulqinit hoqi dorë nga kjo kontratë, por e pagoi shumë shtrenjtë. Nëpërmjet Gjykatës Ekonomike të Podgoricës, komuna e Ulqinit sivjet u desh të paguajë 24o mijë marka si rezultat i kamatave ekstreme.

     Për këto dëme që i janë sjellur komunës së Ulqinit, askush nga pushtetarët nuk është marrë në përgjegjësi edhe pse kemi të bëjmë me një plaçkitje tepër të rëndë. Kohë më parë në parlamentin lokal u paraqit një informatë mbi këtë çështje, por u vendos që të bëhet raport. Kur do të jetë gati ai, në mënyrë që të dihet diçka më shumë për këtë aferë edhe cili do të jetë epilogu i saj.(Intron)

Vdiqen 

Zejna Kollari (62),Meterriz-Ulqin

Oso Alaj (76) Katerkolle-Ane te Malit

Cen Musaja (75),Brajshe-Ane te Malit

Midja e Qamil Dabit (85),Ulqin

Ulqin, 22 dhjetor-Qeveria e Malit të Zi shtetasve të saj  u dërgoi “urimin” e parë për Vitin e Ri, shtrenjtoi benzinin  l5 për qind .Kështu, qe sot 1 litër benzin kushton l,7o, ndërsa dizeli l,3o DM. Qeveria këtë korrigjim e arsyetohet veç  të tjerash  se mjetet nga ky shtrenjtim do të përdoren për “financimin” e veprimtarive afarsite, të cilat sigurojnë punësim më të madh, si dhe për realizimin e projekteve të infrastrukturës e mbi të gjitha ndërtimin e tunelit "Sozina”. Qeveria, siç thuhet, ka pasur parasysh edhe çmimin minimal të punës që ngritet prej 8o në 9o DM. Ky shtrenjtim i karburantëve të naftës është pritur shumë negativisht  sepse ndikon edhe shtrenjtimin e transportit, të shërbimeve të tjera, e sidomos  të artikujve vitalë ushqimorë.

Sidomos u prit me shqetësime nga kategoria e qytetarëve të cilët janë papunë ose kanë dalur nëpër rrugë të shesin plaëka të ndryshme për të siguruar bukën e gojës. Qeveria malazeze  nuk e merr parasysh këtë gjendje të rëndë sociale.

Çmimet e deritashme ishin l,5o DM edhe ishin të formuara kur një barelë e naftës në burzën ndërkombëtar shitej 29 dollarë, kurse dje  një barelë kushtonte l9,4 dollarë.
Ky shtrenjtim, Malin e Zi që nga dita e sotme e radhit në vendet me benzinin më të shtrenjtë në Ballkan. (Intron)

Ulqin, 22 dhjetor- Bulevardi që fillon pranë Ndërmarrjes Komunale e deri në afërsi të Plazhit të Madh, ka shkaktuar që të montohen edhe tubacionet e ujësjellësit të ri  në këtë pjesë. Bulevardi dhe ujësjellësi është dashur të përfundojë që në pranverën e sivjetme që të jetë gati për stinën turistike, mirëpo rregullimi i marrëdhenieve pronësore –juridike, ndër të tjera, kanë ndikuar në këtë vonesë. E, shtojcë për mospërfundimin e këtij projekti është edhe montimi i ujësjellësit të ri në Fushën e Ulqinit.

 Ndërkaq, për shkak të temperaturës së ulët, nuk janë zhvilluar punët përgatitore, bëhet e ditur se ky montim  shtyhet, por nuk theksoihet se deri kur do të jetë kjo. Punimet në këtë ujësjellës në gjatësinë prej l2oo metrash do t`i  bëjnë punonjësit e NPK, në kuadër të së cilit është edhe ujësjellësi komunal i Ulqinit.(Intron)

Ulqin, 22 dhjetor- Edhe Ndërmarrja Komunale dhe Ujësjellësi i Ulqinit, siç duket, kanë mësuar nga Elektroekonomia e Malilt të Zi dhe Telekomi i kësaj republike, shkyçja e borxhlinjve. Pa furnizim me ujë të pishëm do të mbesin të gjithë ata të cilët-

    Ndërmarrjes Publike Komunale i kanë borxh mbi loo marka. Bëhet e ditur se qytetarët NPK i kanë borxh 2oo mijë, kurse ekonomia 4oo mijë marka.(Intron)

 (Skicë përditshmërie në Ulqin)

Ulqin, 22 dhjetor- Reduktimet e shtrenjtimet e rrymës elektrike, borxhet për ujin, kanalizimin, telefonin kanë qenë shqetësimet e përditshme të një pjese të konsiderueshme të banorëve të Ulqinit, të cilët nuk e kanë lehtë të gjallërojnë ekonomikisht. Mirëpo, që nga dita e sotme brengat u shtuan edhe më shumë sepse “qeveria e territ dhe e varfërisë” ngriti çmimet e benzinit l5 për qind. Detyrimisht ky shtrenjtim ka për të “stimuluar” edhe ngritjen e çmimeve të artikujve ushqimorë e shërbimeve të shumta.

-Ec e fitoje një phening të vetëm. Jam plakur unë, është moshuar burri, fëmijët janë të ri edhe nuk  marrin  parasysh se për çdo ditë nga kuleta, “hiq e mos ven”. Duan celularin, veturën, veshmbathjen, daljet me shoqëri- i ankohet fqinja fqinjes.

-Pa, pa, njashtu isht besa. Nuk isht ba kallaj jeta. Burri jem e ka pensionin l3o, par tesh isht ba nji rritje edhe i ka marrë l5o marka. Çka me ble ma parë me ata pare.,-përgjet tjetra.

 -Nuk kam nevojë, jo hë për hë për para, por a keni punë ju atje?-pyet në telefon të Intron-it  një 75-vjeçar, sigurisht të birin në Australi, i cili sipas të gjitha gjasave desh t i dërgojë ndonjë dollarë, e plaku i tha se ka siguruar dru edhe ushqim për dimër.-Nuk kam nevojë,jo. Edhe me shëndet jemi mirë, e ishalla jeni me jetë. Prisim se do të vini në verë, e? Ashtu,a? As atje nuk qenka kollaj-a?

-Punoj në këtë kuzhinë popullore. Jam me rrogë mujore, pa sigurim, marr vetëm 2oo marka. Jam i ri edhe pas shkollës së mesme nuk kam pasur mundësi të vazhdoj studimet sikur moshatarët e mi në Prishtinë. Shumë klientë, punëtorë krahu, nuk kanë para që të paguajnë. Më vjen keq që janë në këtë gjendje. Vetëm zoti e di se cila do të jetë ardhmëria ime edhe e tyrja. Rastin e parë që ta kem do të shkoj në botën e jashtme. E di se as atje nuk është lehtë,por ndoshta atje është më mirë. I kam mbushur 25 vjet edhe njerëzit më thonë- martohu. Në këtë gjendje më mirë të heq dorë, sepse nuk dua të marr askë në qafë. ”Ne jemi brezi i humbur”-titullohet  albumi i një këngëtarit tonë,- thotë ky i ri i zhgënjyer.

Por, nuk është ai i vetëm.Gjithësesi më të zhgënjyer duken ata të cilët bredhin poshtë e lartë pa asnjë punë.

Vetëm zoti e di ,- përgjigjen kur i pyet njeriu se si e sheh ardhmërinë. (Intron) 

Ulqin, 2l dhjetor-Për shkak të shkëputjeve të lidhjeve telefonike dhe të reduktimit të energjisë elektrike nuk kemi pasur mundësi të botojmë lajmet në Internet. Mirëpo ne suksesivisht do të shënojmë të gjitha ngjarje më kryesore që janë zhvilluar këto në hapësirën që mbulojmë, në Ulqin, Krajë, Anë të Malit, Malësi etj.

Në saje të angazhimit të Telekomit të Malit të Zi, e sidomos të qendrës në Ulqin janë rivënë lidhjet. Kanë qenë të shkëputur mbi 8oo numra. Kanë qenë pa lidhje telefonike Kuvendi i Komunës së Ulqinit, partitë politike, policia, Radio-Ulqini, Qendra e Kulturës, thënë shkurt i gjithë qyteti i Ulqinit. Konkretisht, nuk kanë funksionuar telefonat gjashtënumërsh, ta zëmë 4l2...

Ulqin, 2l dhjetor-Një ditë para Bajramit edhe Krajën e përfshiu një mot i ftohtë edhe me reshje të mëdha bore. Varësisht nga katundet, por mesatarisht është 3o deri në 5o cm borë. Kanë mbetur shumë veta pa arritur në Krajë, sidomos ditën e parë të Bajramit. Si rëndom, aksi rrugor Rashtishë- Arbesh, posaçërisht nëpër Qafë të Shtegvashës, ka qenë i pakalueshëm. Ndërmarrja e rrugëve ka hudhur kripë, por duhet pasur shumë vemendje edhe automjetet të jenë me pajime dimërore. Sot, të martën, ditë tregu në Ulqin kemi takuar shumë kranjanë, posaçërisht nga katundet buzë liqenit, si nga Boboshti, Skjeja dhe Sjerçi, por edhe nga Dodajt,

 Kështenja, Ostrosi etj. të cilët kishin dalur për të shitur prodhimet bujqësore e peshk. Që të gjithë thonin se rrugët janë hapur, por vazhdon të bjerë borë. Nëse vazhdon ky mot i ftohtë, me ngrica e erë verilindore, bora do të vonojë të shkrihet. Fatmirësisht atje kanë funksionuar linjat telefonike, por reduktimi i energjisë elektrike vlen edhe për ata. Nuk është regjistruar asnjë incident trafiku. Edhe furnizimim me arikuj ushqimorë nuk ka munguar sepse banorët janë përgatitur me kohë(Intron)

Ulqin, 2l dhjetor-Mediat malazeze njoftojnë se kjo republikë ndodhet në një gjendje jashtëzakonisht të rëndë elektroernegjetike, madje para një errësire totale, gjendje e plotë kolapsi. Reduktimet katërorëshe vazhdojnë, por shumë gjigande industrial, siç është Kombinati i Aluminit në Podgoricë e ka reduktuar deri në maksimum veprimtarinë prodhuese. Energjia sigurohet nga sisteme të jashtme, mirëpo rumunët janë duke dërguar kërcënime  se do të ndërprejnë furnizimin me sasirat e kontraktuara “nëse vazhdohet importimi i paautorizuar i rrymës”, duke theksuar se do ta ndajnë sistemin e tyre elektroenergjetik nga ndërlidhjet.

 Për të përballuar këtë krizë, Elektroeenergjia e Malit të Zi së bashku me mekanizmat përkatëse të qeverisë republikane po bëjnë përpjekje intensive për të  siguruar sasira shtesë, së paku l5o deri në 2oo megavat. (Intron )

06.12.2001-Ludwigshaven. Njoftimit te publikuar ne shtypin lokal Gjerman per grumbullimin e sa me shume pakove, dhurate per femijet shqiptare, shkollat,kishat dhe individe te shumte  iu pergjigjen me efikasitet te plote. Keshtu gjate diteve te aksionit  u grumbulluan nje numer i konsiderueshem pakosh te cilat moren rrugen ne datat kater dhe pese Dhjetor per tju mberritur ne duar femijeve shqiptare ne diten e Festes. Merita e femijeve Gjerman per efikasitetin e treguar eshte e barazvlefshme  me angazhimin e Shoqates  Kristiane Shqiptare „Kuvendi i Arberit 1703“ me qender ne Ludwigshafen, e kryesuar nga Nikolle dhe Leze Shabani te cilet jo vetem qe e ndermoren aksionin ne fjale por u perkujdesen deri ne finalizimin e plote te tij. Pakot e para i jane dhuruar femijeve ne kishen e Recit menjehere pas perfundimit te meshes organizuar per Festen e Shenkollit.
Ne nje atmosfere teper festive eshte bere shperndarja e dhuratave per femijet parashkollore  te kopshtit te Solidaritetit ne qytetin e Ulqinit dhe atyre te klasave te para te shkollave fillore te Anes se Malit. Femijet jane shoqeruar nga drejtori i shkolles Dr.Nail Draga si dhe ekipi  mesimdhenes te cilet njeherazi i kane falenderuar organizatoret per kujdesin e tregur per femijet e kesaj zone.

 Nje sasi e dhuratave iu shpernda  gjithashtu edhe nxenesve te shkolles fillore „Gjergj Kastrioti – Skenderbeu“ ne Kraje si dhe femijeve qe ndjekin mesimin e Katekizmit ne Famullite e Ulqinit dhe Tivarit, te cilat drejtohen nga Arqipeshkvi Zef Gashi. Po keshtu ndihma kryesisht ne veshembathje i jane dhuruar shtepise se pleqve ne gjirin e Kotorit.

 Nje ndimese ne shperndarjen e dhuratave ne te gjithe zonen kane dhene  bashkepunetoret e Karitasit, Don Viktori, Motrat e Arqipeshkevise si dhe qytetare te shumte.
Ka qene shperndarja e pakove  per femijet e veriut te Shqiperise te ngujuar nga gjakmarja, ajo qe kurorezoi me mjaft sukses aksionin ne fjale i cili sipas prononcimit te Z.Nikolle Shabani  ne Radio Ulqini, eshte bere tradite, dhe vitin e ardhshem  do te perfshi pjese te tjera te trevave Shqiptare sikurse eshte perqendruar vitine kaluar ne qytete te ndryshme ne Kosove, si ne Prizren, Peje, Krushe te Vogel, si dhe jetimoren ne Prishtine. (Seksioni Informativ - Chris.Alb.e.V.-  Ludwigshafen për Intron)

Kryeministri malazias reisin e Bashkësisë Islame të Malit të Zi 

Podgoricë, l4 dhjetor- Kryemnistri i Malit të Zi, Filip Vujanoviq i ka dërguar urim reisit të Bashkësisë Islame të Malit të Zi me rastin e festave të ardhshme.

-Ju, kuadrit fetar dhe të gjithë besimtarëve të Bashkësisë Islame në Mal të Zi  me rastin e përfundimit të muajit të Ramazanit, ju uroj festën e madhe të ardhshme të Bajramit me dëshirë që ta kaloni në paqe, gëzim e me shëndet, duke u dëshiruar lumturi personale për ju dhe familjen tuaj,-thuhet në urimin e kryeministrit malazias.(Intron)

Luigj Shkreli (Partia Demokratike e Socialistëve):”Në emër të këshilltarëve dhe të degës së PDS për Ulqinin më lejoni  t`iu uroj të gjithë besimtarëve islam festën e Bajramit, duke iu dëshiruar lumturi në jetë, në familje. Bajramin e prit`shi dhe e lut`shi  gjithmonë me zemër të mirë”.

Në emër të klubit të këshilltarëve të partisë së tij uroi edhe Bozhidar Jashoviq (Partia Popullore Socialiste), Dedë Zadrima

 Klubet e këshilltarëve në Parlamentin lokal të Ulqinit 

Ulqin, l4 dhjetor-Në seancën e sotme të parlamentit vendor, në të cilën u miratua rebalanci i buxhetit komunal për sivjet, përfaqësuesit e klubeve të këshilltarëve të partive politike që marrin pjesë në këtë kuvend dërguan urime për festën e Bajramit të Madh.

Urimet i publikojmë sipas radhës që u paraqiten në parlament.

Ulqin, l4 dhjetor- Pastiçeritë e këtushme kanë  angazhime të jashtëzakonshme.Gjatë gjithë ditës së sotme kanë pranuar porosi të shumta për ëmbëlsira, shtojcë. Më të preferuarat janë tortat e stileve dhe madhësive të ndryshme.

 Siç duket, kësaj radhe amviset kanë vendosur që tryezat e tyre të jenë sa më të plota për të festuar me të afërmit, miqtë e të ftuarit e tyre Bajramin e Madh, jo vetëm me specialitet shtëpiake.(Intron)

 Ulqin, l4 dhjetor-Mbi bazat e lajmeve që arrijnë nga Rozhaja mësojmë se vendkalimi midis Malit të Zi e Kosovës, ai në Kullë, është pastruar nga bora edhe qarkullohet pa pengesa. Vozitësit, patjetër, në automjetet e tyre duhet të përdorin pajisjet dimërore.

 E themi këtë sepse shumë veta që ndodhen në Kosovë dëshirojnë që festën e Bajramit   ta kremtojnë në gjirin e tyre familjar në Plavë, Malësi, Krajë, Anë të Malit, Ulqin.(Intron)

Ulqin,l4 dhjetor-Mediat malazeze kanë njoftuar sot se Aeroporti i Podgoricës në orët e paraditës ka qenë i mbyllur për shkak se është paralajmëruar që në aeroplanin e 

kompanisë ajrore të Malit të Zi, “Montenegro-airlajns”, i cili duhet të fluturonte për Beograd në orën 7,45 minuta , është vendosur bomba.

Pas kontrollimit të organeve të policisë dhe vërtetimit të tyre se lajmi ishte dezinformatë , aeroplani i kompanisë malazeze ka fluturuar në destinacion rreth orës lo,oo ,mirëpo si shkak i kësaj dezinformate,të gjitha linjat ajrore nga Aeroporti i kryeqytetit të Malit të Zi kanë vonuar.(Intron)

Ulqin, l5 dhjetor-Edhe pse mbretëroi ditën  një mot me shi të imtë edhe i ftohtë,pa energji elektrike, në orët e mbrëmjes  qyteti u furnizua me rrymë edhe po zhvillohet një atmosferë solemne në pritje të Fitër Bajramit.Vërehen se kanë ardhur edhe mërgimtarë që këtë festë të madhërueshme ta kalojnë në gjirin familjar.Të gjitha xhamitë e qytetit dhe shtëpitë janë të shndërritura,kurse fytyrat e njerëzve i përshkon buzëqeshja dhe hareja që me aq gëzim e lumturi e kaluan muajin e Ramazanit.

Mësojmë se nesër në të gjitha xhamitë do të falet Bajrami dhe do të mbahen ligjërata rasti nga imamët. Mediat lokale dhe ato republikane transmetojnë urimet e autoriteteve dhe të partive politike dërguar Bashkësisë Islame të Malit të Zi dhe të të gjithë besimtarëve islam në këtë republikë.(Intron)

Ulqin, l5 dhjetor-Në Mal të Zi po mbretëron një gjendje shumë dramatike si rezultat i mungesë edhe ka paralajmërime se kjo situatë mund të bëhet edhe më e rëndë, shkyçje totale e furnizimit me energji elektrike.Krejtësisht papritur  në mbarë Malin e Zi u vendos  reduktimi i energjisë elektrike. Nuk është publikuar se sa mund të zgjasë kjo situatë, as nga sa orë do të zbatohet përkufizimi.Ulqini ,që nga ora 8 e mëngjesit e deri në orën l5,3o nuk ka pasur furnizim me energji elektrike dhe krijoi një gumëzhitje në qytet që paralizimi I trafikur ka ndodhur kësisoj vetëm verës nga autoveturat e shumta.Zyrtarët e Elektroenergjisë kanë u bërë apel qytetarëve dhe të gjithë shpenzuesve të energjisë që të shlyejnë borxhet dhe të kursejnë deri në maksimum.

Ata u kanë bërë ftesë radiove dhe televizioneve që të shkurtojnë programet e tyre ditore.Nga data l nëntor rryma elektrike është shtrenjtuar 5o pë qind dhe çmimi aktual për amvisri është 7,44 si çmim stinor, por zyrtarët e elektroekonomisë malazeze thonë se do të jetë konstant.

Mësojmë se Malësinë e ka mbuluar bora,por edhe në qendrën lokale të saj, Tuzin që rrallë herë ndodh në këtë kohë të vitit.(Intron)

Ulqin, l5 dhjetor-Kryesia e degës së Unionit Demokratik të Shqiptarëve për Malësinë ka dhënë dorëheqje të parvokueshme nga kjo parti .Këtë vendim e kanë kumtuar në konferencën për shtyp përfaqësuesit e saj në Podgoricë. Kryetari i kësaj dege, Fran Gojçaj ka njoftuar gazetarët se për shkak të pozicionit inferior edhe nënçmues që na e ka imponuar  UDSH, dega në Ulqin, kryesia e UDSH, dega e Malësisë ka vendosur për të dhënë dorëheqje në të gjitha funksionet  në këtë parti.

Z. Gojçaj e ka akuzuar degën e Ulqinit  se ajo vazhdimsht ka pasur qëllim t`i imponojë rolin e tutorit Malësisë dhe se, siç ka thënë ai, në këtë çështje e ka ndihmuar Ferhat Dinosha.

-Vërejtjet tona të argumentuara se Dinosha po e keqpërdor pozitën nuk kanë dhënë rezultate.Ulqini sivjet Dinoshës  I ka lejuar vendin e parë në listën e deputetëve, kurse vendi I dytë I është dhënë Malësisë.

Më pastaj Dinosha është bërë deputet  dhe logjikisht, ka qenë e arsyeshme  unë,që isha në vendin e dytë në listë të marr Ministrinë e Grupeve Nacionale dhe Etnike në Qeverinë e Malit të Zi,- ka deklaruar nënkryetari I deritashëm I Unionir Demokratik të Shqiptarëve, Prelë Vulaj. Ai ka thënë se gjatë qëndrimit të fshehtë të Dinoshës në Ulqin ka pergatitur skenarin që vendin  e ministrit ta përvehtësojë Ulqini. Malësisë atëherë I është ofrohet vendi I parëndësishëm, e jo ministria e cila I takon  sipas të gjitha kritereve dhe meritave. Na kanë ofruar një vend të padëfinuar  për ta  shndërruar më vonë në zëvendësministër dhe kështu me radhë..Por, Malësia I refuzon të gjitha këto veprime dhe oferta të turpshme të një privatizimi të paskrupullt të UDSH. Në këtë mënyrë ne e braktisim këtë parti-ka thënë Vulaj, njoftojnë mediat malazeze.(Intron)

 Krajë, l3 dhjetor- Një mot i thatë, i përcjelle me erë veriore dhe temperatura të ulëta, prej – 8 deri në +9, ka ndikuar që të bjerë edhe bora e parë në malet e Krajës, por, siç mësojmë nga banorët e kësaj ane, të cilët i takuam në orët e pasdrekës në Ulqin, në Krajë ka pasur reshje të borës edhe në viset e ulëta, por nuk ka zënë vend.

 Rruga Krajë-Lijare-Virpazar është e qarkullueshme. Po ashtu edhe ajo Krajë-Anë të Malit në asnjë vend nuk është e mbuluar me borë edhe pse meteorlogët paralajmërojnë edhe për nesër mot të ngjashëm me ditën e sotme. (Intron)

 Ulqin, l3 dhjetor –Kësaj jave është paralajmëruar se Ndërmarrja “Podgorica-expres” do të vë linje të përditshme të autobusit në relacionin Ulqin-Podgoricë-Shkodër-Tiranë. Po të njajtin veprim do ta bëjë edhe një ndërmarrje nga Tirana, po në këtë relacion. Këto janë linjat e para të autobusit që vendosen midis dy shteteve fqinje. Deri më tash kanë qarkulluar vetëm furgon taxi të pronësisë private. Autobusi nga Ulqini niset në orën 5,oo dhe  bileta në një drejtim kushton 35 marka.

 Deri në fund të këtij muaji duhet të përfundojë rikonstruimi i hekurudhës Podgoricë-Bajzë(stacioni i parë brenda Shqipërisë), e më pastaj deri në Shkodër, që i paraprin vendosjes së qarkullimit hekurudhor Podgoricë-Shkodër. Përveç trenave transportues, do të vendoset edhe treni i udhëtarëve, kanë njoftuar përfaqësuesit e hekurudhës së të dy shteteve fqinje. Mbetet për të punuar në realizimin e vendosjes së vijës ujore nëpër liqenin e Shkodrës.(Intron)

 Ulqin, l3 dhjetor-Në konferencën e djeshme të shtypit  katër organizata joqeveritare i kanë bërë vërejtje të theksuara pushtetit vendor të Ulqinit, i cili shfaq rezerva të mëdha për të bashkëpunuar me sektorin joqeveritar. Në Ulqin janë të regjistruara rreth l5 OJQ edhe disa prej tyre kanë veprimtari të dukshme në kulturë, mbrojtjen e ambientit të njeriut, mbrojtjen e të drejtave të gruas, të fëmijëve etj.

Kryetari i OJQ «Horizonti i ri» Nazif Veliqi ka thënë se pushteti vendor sikur nuk është në dijeni se ekziston Ligji mbi organizatat joqeveritare.

  Nëpërmjet sektorit joqeveritar do të mund të realizonte shumë projekte. Sektori joqeveritar në komunën e Ulqinit  është shumë aktiv, mbase më i dalluari në Mal të Zi. Ne kemi bashkëpunim të mirë me shumë organizata dhe fondacione në Evropë, kurse qeverisja lokale e Ulqinit është duke na injoruar, është shprehur Nazifi.(Intron)

Ulqin, l3 dhjetor-Mbi loo intelektualë të Malit të Zi me një letër protestuese u janë drejtuar qeverive të ndryshme që t`I  kthejnë kësaj republike të drejtën për të ekzistuar dhe subjektivitetin ndërkombëtar, duke potencuar se është padrejtësi që nga kjo republikë të kërkohen kushtet e referendumit të cilat janë në kundërshti me ata të Bashkimit Evropian dhe SHBA. Intelektualët malazias theksojnë në letrën e tyre se këtë të drejtë ia garantojnë të gjitha rezolutat e Kombeve të Bashkuara dhe të gjitha rregullore ndërkombëtare për të drejtat e njeriut.

 Pasi shumica e qytetarëve të Malit të Zi zgjedh pavarësinë e këtij shteti, kërkojnë nga Bashkësia Evropiane dhe SHBA që të respektojnë vullnetin e lirë të qytetarët të Malit të Zi dhe jo ta nënshtrojnë atë në projektet e Serbisë së Madhe, ndërsa popullin malazias ta shpallin popull pakicë në një shtet të ardhshëm serb, theksohet në letrën protestuese të intelektualëve malazias dërguar qeverive evropiane dhe SHBA.(Intron)

Ulqin, l2 dhjetor-Piktori nga Ulqini, Qazim Muja është fitues i çmimit  të konkursit anonim për logotip të  gazetës në themelim e sipër “Koha javore”. Këtë na e konfirmoi kryetari i Komisionit vlerësues i këtij konkursi i zgjedhur nga Këshilli programor i javores në gjuhën shqipe.

Piktori Muja, me origjinë nga Ftjani i Krajës, opinionit kulturor i është i njuhur nëpërmjet ekspozitave kolektive dhe individuale në Krajë, Ulqin, Tivar e shumë qytete tjera në Mal të Zi, por edhe në Shkodër e Tiranë. Njihet edhe si ilustrues i librave dhe revistave që dalin në kuadër të Shoqatës së Artistëve dhe Intelektualëve “Art Club” me seli në Ulqin.

 Ky nuk është çmimi i vetëm i tij. Vitin e kaluar piktori Muja, në një konkurencë të fortë, u nderua me shjpërblimin e parë në konkursin anonim për embëlemen e Ulqinit.

Logotipi për “Kohën javore” është një vazhdim i serisë së parë të revistës “Koha”, e botuar nga viti l978 deri më l988.

Sot u mbyll edhe konkursi për pranimin e punëtorëve të gazetës “Koha javore” dhe shpresohet që së afërmi do të dalë në dritë ajo që do të financohet nga buxheti shtetëror.(Intron)

Ulqin, l2 dhjetor- Sa më shumë që po afrohet festa e madherueshme e  Bajramit të Madh, lypësit janë versulur masovikisht nëpër lagjet periferike të Ulqinit. Secili jep lëmoshë aq sa ka mundësi. Mirëpo, hetohet një gjest shumë i çuditshëm i lypsarëve. Ata nuk kënaqen me atë çu ofrohet, por ekskluzivisht duan para dhe veshëmbathje, duke thënë se tash ndodheni para festës suaj të shenjtë edhe nuk duhet të kurseni për të ndihmuar ata që u trokasin në derë.

Për të realizuar lëmosha sa më të shumta, merren edhe fëmijët, madje edhe të posalindurit. Nëse nuk janë të kënaqur me atë që u dhurohet, nuk kursejnë as fjalët më të rënda.

 Lypsarët janë romë të ikur pas luftës nga Kosova edhe janë të vendosur në Tivar apo në qytete tjera të bregut të detit të Malit të Zi. Nuk është hera e parë që arrijnë në këtë mënyrë në Ulqin, përkatësisht në lagjet periferike të tij, ku rëndom janë të koncentruar të ardhur nga Kraja e Ana e Malit, sepse brenda në qytet ndodh shumë rrallë të trokasin në dyer për të kërkuar lëmoshë. Njerëzit tanë përherë kanë qenë të gatshëm për të ndihmuar nevojtarët, por edhe lypsarët duhet të dinë të çmojnë atë që u ofrohet e jo nëse ndahen duarthatë apo nuk e kanë marrë atë që kërkojnë, pakënaqësinë ta shfaqin me fjalë agresive dhe fyese. Çdokush e nderon veten e tij, thotë një urti e jona.(Intron)

Ulqin, l2 dhjetor-Në katundin Krythë filloi ndërtimi i shkollës së re aty në vendin e objektit të moçëm, që parashihet të jetë gati deri në vitin e ardhshëm shkollor. Mjetet financiare për realizimin e këtij projekti do t`i sigurojnë mërgimtarët e këtij fshati në shtetet perëndimore, por pritet që me kontributët e tyre të inkuadrohen edhe banorët e Kryethës. (Intron)

 Ulqin, l2 dhjetor- Në adresë të Sekretariatiti Republikan për Informata të Malit të Zi ka arritur dje një dërgesë në të cilën është gjetur pluhuri i bardhë dhe moneta prej lo mijë lirash italiane.
Dërgesa është e vulosur në një postë të Podgoricës, thuhet ndër të tjera në komunikatën e Sekretariatit Republikan për Informata të Malit të Zi. Me këtë dërgesë është njoftuar ministria e Drejtësisë.(Intron)

Ulqin, ll dhjetor-  Shoqata ekologjike “Kalimera” e Ulqinit ka publikuar  një komunikate në të cilën ndër të tjera thuhet se  ka ndodhur një incident i rëndë ekologjik në kanalin e Portomilenës.

Ky kanal është bërë pika  më e zezë ekologjike e këtij rajoni. Kryetari i Shoqatës ekologjike “Kalimera” Xhelal Hoxhiqi thotë se ngordhjen masive të peshkut e ka hetuar patrulla jonë ekologjike, duke theksuar se këtij kanali i duhet kushtuar një përkujdesje më të madhe sepse paraqet rrezikun e ndotjes së ambientit,  jo vetëm të bregdetit të Ulqinit. Kjo shoqatë ka kërkuar nga  organet  e pushtetit lokal dhe atyre republikane që të ndërmarrin masa urrgjente për të zbuluar shkaqet e këtij  incidenti  ekologjik.
 

 Nga këto rrethana kanë ngordhur  sasira të mëdha të peshkut.Mirëpo, kryetari i Shoqatës ekologjike “Kalimera” ka thënë se uji i ftohtë nuk është shkaktar i peshkut të ngordhur dhe se, sipas tij, ky incident  ka ndodhur për shkak  të derdhjes së kanalizimit ,por për këtë duhet ta konfirmojnë organet kompetente.

Drejtori i Kripores  së Ulqinit,  Anton Kastrati në mënyrë kategorike i ka hudhur poshtë pohimet se gjoja kjo ndërmarrje  ka hudhur mbeturina të kripores. Ne kaherë e kemi grumbulluar kripën edhe nuk e kam të qartë se përse lansohen këso deklaratash qëllimkëqia, ka thënë drejtori i Kripores. Në tregun e Ulqinit konsumatorët kanë hezituar të blejnë peshk, duke qenë të bindur se është nga Portomilena.(Intron)

Ulqin, ll dhjetor-Parlamenti lokal i Ulqinit u mor sot me realizimin  e parametrave të buxhetit të sivjetëm.Këshilltarët thanë se pushteti vendor nuk ka arritur të mbledh taksat e banimit gjatë stinës kryesore turistike edhe ka humbur një shumë e madhe mjetesh financiare.Obliguesit vendor i kanë kryer detyrimet e tyre mbi 85 për qind,  ndërsa të hyrat nga republika janë realizuar vetëm 53 për qind.

Një vërejtje të madhe,sidomos këshilltarët e Lidhjes Demokratike në Mal të Zi bënë vërejtje se nga buxheti komunal është injoruar në terësi sporti. Me buxhet sivjet kanë qenë paraparë 6o mijë marka, por janë paguar vetëm 7 mijë dm.

 Dikush nuk k interes që skuadrat nga Ulqini t`I shohë në një rang më të lartë sportiv në Mal të Zi, shfaqi mendimin Hajrullah Hajdari, këshilltar i LD në MZ, parti kjo që është në pushtet tash dhjtë vjet e më shumë. Edhe Hilmija Dervishi, këshilltar i Partisë Demokratike të Socialistëve u angazhua që sportit t`i jepet një trajtim më adekuat.

Edhe kryetari I Klubit të këshilltarëve të LD në MZ kërkoi që të kryhen obligimet buxhetore.Ai tha se si është e mundur që nga 36 mijë markat e paraaapara me buxhet, partive politike u janë paguar vetëm lo mijë DM.Ne, shtoi ai, në Tivar jemi të përfaqësuar vetëm me dy këshilltarë, por marrim më shumë mjete financiare se sa në Ulqin që jemi partia shumicë.(Intron)

 Ulqin, ll dhjetor- Në  konferencen e djeshme  për media në  Podgoricë, ka thënë se  se gjeneratori kryesor i krizës në Evropën Juglindore është nacionalizmi agresiv,  e mbi të gjitha ai serbomadh, i cili gjatë këtyre pesëmbëdhjetëvjetëve ishte i orientuar në pushtimin e territoreve të huaja dhe ndërrimin e kufijve dhe krijimin e Serbisë së Madhe dhe etnikisht të pastërt.

Sipas kryetarit të KMH, Sllobodan Franoviq
nacionalizmi serbomadh është ende gjallë edhe
këtë e ka ilustruar me  qëndrimi i regjimit të Beogradit
 ndaj  B e H, Kosovës dhe Malit të Zi. Franoviq është
angazhuar që  të gjitha  projektet me përmbajtje
nacionaliste duhet të shfuqizohen. Në Mal të Zi duhet
të krijohet një ambient ku të gjithë qytetarët, pa marrë
parasysh përkatësinë nacionale, fetare dhe politike,
do të mund të marrin pjesë në jetën politike, duke
theksuar se për ne përparësi duhet t u  jepim
dorëzimit të kriminelëve të luftës në Tribunalin e Hagës.

 Franoviqi ka tërhequr vërejtjen se për shkak se në Mal të Zi ende policia dhe ushtria nuk është vënë nën kontrollin civil, ndodhin shkelje të të drejtave të njeriut.Shumnë të rinj nga Mali i Zi, e veçmas pjesëtarë të popujve pakicë, janë të ballafaquar me probleme të shumta nga shkaku se janë të detyruar të shkojnë në shërbim ushtarak, në një ushtri e cila themelet i ka vënë mbi klerikalizëm,ka thenë kryetari i KMH dhe ka pohuar se shumë të rinj të popujve pakicë nga Mali i Zi është dashur të marrin rrugët e mërgimit edhe ka thënë se një numër i konsiderueshëm i tyre ndodhet nëpër qendra të azilkërkuesve në Norvegji,Suedi dhe Holandë, sepse pushteti   i Malit të Zi nuk ka arritur të mbrojë të drejtat e tyre njerëzore. (Intron)

Ulqin, lo dhjetor-Organizata amerikane, ICMA dhe përfaqësuesit e pushtetit vendor, mbajten sot një konferencë shtypi nëpërmjet të cilës informuan gazetarët mbi pjesëmarrjen e qytetarëve në formimin  e realizimin e buxhetit komunal. Kjo risi është duke u zhvilluar në pesë komuna të Malit të Zi, e më vonë do të ndjekin këtë metodologji të gjitha administratat komunale.

 Poenta e këtij projekti është që në buxhetin e komunës në mënyrë të drejtpërdrejt dhe transparente të marrin pjesë edhe vetë qytetarët. Deri në fund të këtij muaji, Kuvendi i Komunës së Ulqinit duhet të miratojë rebalancin e buxhetit komunal, ndërsa deri në fund të muajit mars edhe buxhetin për vitin e ardhshëm. Në këtë kuadër do të marrin pjesë edhe vetë qytetarët. Sekretari komunal për ekonomi e buxhet, Xhemal Bushati tha se komuna e Ulqinit tashmë është inkuadruar në këtë projekt. Në interesimin e gazetarëve se cilët projekte ka kandiduar komuna e Ulqinit edhe cila do të jetë shuma e mjeteve që Ulqini do të mbështetet nga USAID me ndërmjetësimin e ICMA-s, përfaqësuesi i kësaj të fundit nuk u dha ndonjë përgjigje të saktë, por theksoi se kjo mbështetje mund të arrijë deri në l milion dollarë amerikan.Ndërkaq, komuna e Ulqinit ka kandiduar tetë projekte, ndër të cilët janë Ujësjellësi, Portomilena, marina etj. Megjithatë, siç u tha, qytetarët do të kenë të drejtë të propozojnë projekte konkrete, pa marrë parasysh nga ata që deponon Kuvendi i Komunës. (Intron)

Ulqin, lo dhjetor-Pas dhjetë shumë të ftohta që ka përfshirë të gjitha viset e republikës, në Mal të Zi janë duke u shpenzuar sasira të mëdha të rrymës elektrike, deri në l4 milion kilovat orë, sepse shumica e familjeve nxehen me energji elektrike.

 Zaten, siç raporton Nëdrmarrja Elektroenergjetike e Malit të Zi, këto rrethana kanë krijuar gjendje dramatike të furnizimit me rrymë elektrike.

Diçka më shqetësues është lajmi që e plasojnë meteorologët, të cilët kanë paralajmëruar se javën e ardhshme do të bjerë borë edhe në viset e ulëta fushore. Temperatura më e ulët në Mal të Zi është regjistruar në qytetin malor të Zhabjakut- l3 gradë celzius.

Në Tivar, Ulqin, Anë të Malit, Krajë, Malësi vazhdon të fryjë ere e ftohtë veriore, por ende nuk janë paraqitur ngrica serioze. Por, gjatë ditës vërehen shumë pak njerëz duke lëvizur nëpër qytet. Dalin vetëm ata të cilët blejnë artikujt e konsumit të përgjithshëm. (Intron)

Tuz, lo dhjetor- Më 28 nëntor të këtij viti në katundin Dushiq afër Tuzit, nisi nga puna, në kanalin 57, Televizioni i parë privat në gjuhën shqipe në Mal të Zi, i quajtur “Boin”, pronar i të cilit është Tomë Boja.

Pronari deklaron se tash ndodhemi në fazën eksperimentale të veprimtarisë edhe ajo do të zgjasë lo- l5 ditë. Programi në TV “Boin” fillon në orën 9 dhe zgjatë deri në 23. Shikuesit kanë mundësi të ndjekin programe të të gjitha zhanreve.

 Fillimisht  programet e këtij televizioni do të ndiqen në viset fushore të Maaalësisë dhe të Komunës së Podgoricës, edhe pse, siç bëhet e ditur, valët arrijnë deri në Krajë, në anën tjetër të liqenit të Shkodrës, komuna e Tivarit. Janë pranuar shumë praktikantë, që do të qëndrojnë deri në Vitin e Ri, thotë pronari, Tomë Boja dhe shton se për të punar në këtë medium ka shumë të interesuar, por çdo gjë varet nga mjetet financiare, thekson ai.(Intron)

Ulqin, 9 dhjetor –  Shtoji, një zonë që shtrihet nga Portomilena e deri në Bunë, është shumë i njohur për të gjithë ata që pushojnë verës në Ulqin, por janë edhe shumëçka që e karakterizojnë këtë fshat kufitar. Kjo trevë vazhdon të jetë edhe sot e gjithë ditën, vend shumë i kërkuar për të ngritur vila dhe kampshtëpiza. Thuhet se  në mbarë këtë katund ndodhen mbi 3 mijë objekte të këtilla, të cilat pronarët i kanë nga republikat e ish-shtetit jugosllav. Janë ngritur lagje të ndryshme të cilat edhe e kanë ndërruar strukturën etnike të popullsisë.

Këto ditë nga Shtoji dëgjohen vërejtje në adresë të Kuvendit të Komunës së Ulqinit që të mos ndajë troje ndërtimi derisa t`u kthehen tokat pronarëve, siç thuhet, legjitimë. Mirëpo, shtojakët po shprehin edhe shqetësime të tjera.Në një takim të para do kohëve me OJQ ekologjike u ankuan se stina e sivjetme turistike u ka sjellur atyre të konsiderueshme.

 Në disa pika janë hudhur sasira jashtëzakonisht të mëdha të lëndëve plastike, por edhe mbeturina të tjera. Veç kësaj, lokaliteti i Shtojit nuk e ka zgjidhur as sot e kësaj dite çështjen e ujësjelësit as të kanalizimit. Përfaqësuesit e BL thonë se kanë shpresë se ata do të ndihmohen nga pushteti vendor në këtë aspekt, në mënyrë që stinën e ardhshme turistike të mos e presin në këtë gjendje tejet kritike që mund të shkaktojë një incident ekologjik me pasoja të paparashikueshme.

Krahas turizmit, bujqësisë dhe peshkimit, lokaliteti i Shtojit është i pasur me rërë që shërben për ndërtimtari. Eksploatimi i saj pa kriter edhe jashtë çdo kontrolli, në këtë anë ka  bërë dëme të mëdha, duke degraduar shumë sipërfaqe edhe sot janë krijuar hurdha të shumta.Është edhe një karakteristikë tjetër se nga nxjerrja e sasirave të rërës, e cila shitet edhe jashtë Malit të Zi,BL e Shtojit nuk përfton asnjë para aq të nevojshme për të zgjidhur ndonjë problem të infrastrukturës.Banorët sivjet disa herë kanë reaguar disa herë.

Degradimin e  Shtojit janë duke e bërë edhe individë të shumtë të cilët ndërtojnë me të madhe në breg të kanalit të Portomilenës.OJQ ekologjike kanë kanë kërkuar që të ndërpritet hovi i të gjitha këtyre dukurive të cilat janë duke e shëmtuar dhe tjetërsuar një zonë me perspektivë, e cila do të mund të shëndërrohej qendër  e turizmit evropian.(Intron)

Krajë, 9 dhjetor-Treva e Krajës, komuna e Tivarit, në asnjë mënyrë nuk mund ta zgjidhë problemin e mbrojtjes shëndetësore. Me dekada të tëra bëhen përpjekje, strukturat e ndryshme politike dhe shtetërore premtojnë vazhdimisht, por deri më sot nuk është bërë ndonjë përmirësim i dukshëm.

 Mjekët e praktikës së përgjithshme nuk qëndrojnë gjatë edhe pse është e siguruar banesa, qofshin të ardhur apo vendës.Tash, vetëm ditëve të tregut ( të mërkureve) vizitat e mjekut janë më të sigurta, por mungojnë ato të specialistëve, internisti dhe mjeku i fëmijëve. Më parë ka funksionuar një barnatore e vogël në kuadër të Ambulancës, mirëpo ajo tani është shumë e varfër. Pacientët janë ose fëmijë, ose të thyer në moshë. Dhe, pikërisht ata për një ilaç janë të detyruar që të shkojnë në Ulqin apo në Tivar.

Nuk funksionon as ordinca e dentistit. Kjo gjendje duhet të brengos zyrtarët e BL të Ostrosit, edhe pse e kanë theksuar përherë, të sensibilizojnë pushtetarët e Tivarit, përkatësisht të Spitalit të këtij qyteti dhe vetë ministrinë e Shëndetësisë që të sigurojnë mbrojtje shëndetësore për banorët e trevës malore të Krajës. (Intron)

Ulqin, 9 dhjetor- Këto ditë  në shenjestër janë mbishkrimet në gjuhën shqipe, sidomos në  në hyrje të Ulqinit. Prseri  pengojnë mbishkrimet e toponimeve në gjuhën shqipe, e sidomos emri Ulqin. Këto veprime bien në sy menjëherë  në kufi me komunën e Tivarit.

Mbishkrimet në gjuhën shqipe janë ose janë shkarravitur ose janë lyer  me ngjyrë  të zezë. Këso rastesh ka pasur në Qafë të Shtegvashën, kufiri i Anës së Malit me Krajën, por janë vënë përseri. Më parë partit shqiptare, përkatësisht organet e administratës lolale të Ulqinit kanë reaguar ndaj këtyre vandalizmave anticivilizuese dhe antidemokratike.

Është interesant se përdhosja e mbishkrimeve në gjuhën shqipe paraqitet me rastin e manifestimeve të ndryshme nacionale të  shqiptarëve në kuadër të të drejtave që garantohen me Kushtetutën e Malit të Zi, por këto norma dikë e pengojnë edhe në këtë mënyrë shfaqin ngarkesat e tyre të cilat bien ndesh me deklarimet verbale te pushtetit të Malit të Zi për një shoqqqëri multietnike. Edhe pse i bien në sy çdo kalimtari, deri më tash nuk ka pasuar asnjë reagim as i organeve shtetërore e as i subjekteve politike. (Intron)

  Ulqin, 8 dhjetor –Realizimi i projektit shumë të përfolur nga të dy anët e kufirit, Malit të Zi dhe Shqipërisë, pika kufitare e Sukubinës/Muriqanit, sipas të gjitha gjasëve ka hyrë në fazën përfundimtare. Në të vërtetë, Gëzim Hajdinaga, ministër i popujve pakicë në Qeverinë e Malit të Zi ka paralajmëruar  se së shpejti do të takohen dy shefat e diplomacive, të Podgoricës dhe Tiranës edhe do të diskutohet edhe çështja e hapjes së pikës kufitare të Sukubinës/Muriqanit. Por, z. Hajdinaga ka shprehur bindjen se ky vendkalim midis Malit të Zi e Shqipërisë do të përurohet deri në muajin maj, në mënyrë që stinën e ardhshme turistike dhe  mysafirët nga Shqipëria, të cilët përzgjedhin Ulqinin dhe bregdetin e Malit të Zi për të kaluar pushimet verore, ta kenë më afër  se sa deri më tash nëpërmjet Hanit të Hotit/Bozhajve.
Hapja e pikës kufitare të Sukubinës/Muriqanit është inicuar nga Parlamenti lokal i Ulqinit, përkatësisht Lidhja Demokratike në Mal të Zi, e cila ka pushtetin vendor, që nga viti l99l. Iniciativa i është dërguar Podgoricës zyrtare e nëpërmjet saj edhe Beogradit.

Në krahun e Ulqinit, në këtë pikë kufitare ka përfunduar kaherë e gjithë infrastruktura e nevojshme, por punët kanë ngecur përtej kufirit, në territorin e shtetit shqiptar. Po ashtu edhe strukturat udhëheqëse të bashkisë së Shkodrës menjëherë pas Ulqinit i kanë deponuar  kërkesë Tiranës për hapjen e pikës kufitare të Sukubinës/Muriqanit. Mirëpo, tash dhjetë vjet qeveria shqiptare, në njëfarë mënyre e  ka mbajtur pezull realizimin e këtij projekti shumë të rëndësishëm për marrëdhenie midis dy fqinjve, Malit të Zi dhe Shqipërisë, e mbi të gjitha si nevojë  e madhe për qarkullim të lirshëm dhe sa më të afërt  ndërmjet Shkodrës dhe Ulqinit. Aktualisht midis këtyre dy vendve ekziston vetëm një pikë kufitare, ajo e Bozhajve/Hanit të Hotit. Banorët e Ulqinit për të arritur këtij krahu deri në Shkodër duhet të kalojnë mbi l8o km, por me hapjen e pikës kufitare të Sukubinës/Muriqanit, midis tyre do të jenë vetëm 38 km. .

Hapja e kësaj pike kufitare krahas rëndësisë ekonomike, ajo  ka edhe një dimension tjetër, përmasën kulturore. Dy qytetet fqinje, Shkodra dhe Ulqini, manifestimet e ndryshme kulturore do të mund t`i organizonin bashkërisht. Në këtë frymë do të mund të bëheshin takime letrare, ekspozita të artit figurativ, mbrëmje muzikore, teatrale etj. ( Intron)

Ulqin, 8 dhjetor - Fillet e arsimit shqip në viset e sotme etnike shqiptare në Mal të Zi, e konkretisht në Ulqin e rrethinë, i gjejmë që në fillim të shekullit të kaluar. Në të vërtetë, në vitin l9l6 u hap shkolla e parë fillore shqipe. Mësuesit e parë kanë qenë bashkatdhetarët tanë nga Zara. Ndërkaq, pas mbarimit të Luftës së Parë Botërore, shkolla u mbyll, për t`u rihapur në fillim të Luftës së Dytë Botërore.

Me iniciativën e intelektualit të madh Ernest Koliqi,siç deklaronte i ndjeri Ruzhdi Alibegu nga Ulqini, në këtë qytet, Anë të Malit, Krajë, Malësi, Plavë e Guci, u dërguan mësuesit e parë nga Shqipëria. Ata ishin mësues të përgatitur, meqë kishin kryer normalen  në Elbasan. Mësuesit e ardhur, me një përkushtim të posaçëm, me nje entuziasëm të devotshëm iu përvesheën punës fisnike për shkollimin e brezit të ri në gjuhën amtare shqipe. Ata ia vunë themelet shkollës shqipe në këto treva, siç kanë qenë Jahja Damnori, drejtor shkolle, Zef Ternaku, Hasan Ibrahimi, Xhemal Lopçi, Prenk G. Stanaj etj.

“Ndihmesa e tyre ka qenë e madhe dhe e çmueshme, sepse ata kanë shërbyer si shembull  i lartë i përkushtimit të madh, cilësish qytetare, atdhetare, demokratike, si burim frymëzimi për kuptimin e zbatimin e detyrave të kohës për edukimin e popullit dhe të rinisë “,- shpjegonte i nderi Ruzhdi, edhe ai vetë veteran i arsimit shqip në Ulqin. Sivjet janë bërë gjashtëdhjetë vjet që në Ulqin erdhën mësuesit e parë edhe nuk e ka parë askush të udhës që të organizohet ndonjë aktivitet përkujtimor ndaj atyre që në Ulqin, Anë të Malit, Krajë, Malaësi, Plavë e Guci sollën germat e para shqipe. (Intron)

 Ulqin, 7 dhjetor- Bashkësia Islame e Ulqinit ka shpallur njoftimin se organizohet udhëtimi për në Haxh-2oo2. Në këtë njoftim ndër të tjera thuhet se të gjithë besimtarët, të cilët sivjet planifikojnë për të shkuar në Haxh, duhet të lajmërohen në Bashkësinë Islame të Ulqinit dhe pasaportat me vizën dalëse për Arabinë Saudite duhet t`I dorëzojnë deri më l janar 2oo2 .

Aranzhmani i sivjetëm është 1.700 dollarë amerikanë, ku përfshihen të gjitha shpenzimet përveç ushqimit. (Intron)

Ulqin, 7 dhjetor-Më në fund, Drejtoria për punë publike po asfalton disa rrugë lokale në qytet e lagjet periferike. Të gjitha së bashku kapin një gjataësi prej rreth 5 km. Zyrtarët e komunës së Ulqinit thonë se faza e parë e këtij projekti duhet të përfundojë para Vitit të Ri, kurse pjesa tjetër në fillim të vitit të ardhshëm edhe krejtësisht duhet të asfaltohen rreth l5 km.

Qeveria, përkatësisht Drejtoria për punë publike financon 5o% për qind të këtij projekti, kurse gjysmën e sigurojnë vetë banorët ku gravitojnë rrugët. (Intron)

Ulqin, 7 dhjetor-Gjatë ditës së sotme edhe këtë zonë e përfshiu një mot me temperaturë të ultë të përcjellë me  veri. Vërtet se nuk janë regjistruar ende ngrica, por në qytet e as në periferi, por duket se dimri po “troket” në derë.

 Dita e sotme e tregut kishte dukshëm më pak blerës edhe pse ofroheshin asortimente të bollshme bujqësore, në veçanti. Në shitje ka pasur sasira shumë të vogla peshku, sidomos nga katundet të bregut të liqenit të Shkodrës nga rajoni i Krajës. Shihet se peshkatarët nuk kanë pasur gjojë. Kishin sjellur peshk të thatë, në veçanti gjumca.

Sot u shiten edhe portokajt e parë nga vendi, por edhe frutat e kivit. Prodhuesit thonë se rendimentet janë mesatare. Pritet që konsumatorët, sidomos ata jashtë Ulqinit, të jenë më të interesuar për të blerë me shumicë. Mirëpo, rënia kaq e shpejtë e temperaturës pa dyshim se e vështirëson edhe vjeljen e agrumeve. (Intron)

(Konikë)

Vdiqen

l.Mehmet Kapllanoviq (55)-Totosh,Ulqin

varrimi u bë në Gjerana,

2.Bahre Axhemi (67)-Totosh, Ulqin

varrimi u bë në Gjerana,

3.Niloviq Lena (90)-Braticë,Ulqin

varrimi u bë në Braticë

4.Gerguroviq  A.Nurije (77)-Metanaj,Ulqin

Ulqin, 6 dhjetor –  Ndërmarrjen Publike Qendra e Kulturës, të cilën e ka themeluar Kuvendi i Komunës  së Ulqinit, pushtetin e të cilit e kanë dy partitë nacionale shqiptare. Në kuadër të saj veprojnë disa njësi punuese, e pa dyshim aktivitetin më të dendur e zhvillon biblioteka, por dallon edhe Skena verore që për çdo vjet mbahet në Kala, ku zhvillohen veprimtari të ndryshme kulturo-artistike.

Qendra e Kulturës ende vazhdon me atë traditë e vjetër të punës, të gjitha veprimtaritë realizohen mbi bazat e mjeteve që i siguron themeluesi, në këtë rast Kuvendi i Komunës. Ç` është e vërteta, ngjashëm veprojnë edhe ndërmarrjet tjera buxhetore, mirëpo shpesh janë të kushtëzuara dhe të penguara në realizimin e projekteve gjegjëse.

Që nga viti l997, konstatohet në raportin e punës së vitit të kaluar të NP Qendra e Kulturës, të cilin këto ditë e miratoi parlamenti lokal, është vazhduar me një planifikim joreal të mjeteve financiare për këtë ndërmarrje dhe vërejtjet i adresohen themeluesit, Kuvendit të Komunës. Si pasojë e mjeteve të reduktura  financiare, nuk ka vazhduar aktiviteti i hulumtimeve në Kala, në qytetin mesjetar të Shasit, në lokalitetet Zogaj e Kërruç, por nuk janë siguruar mjete financiare  as për blerjen e titujve të rinj  të librave, aq të domosdoshme, për të pasuruar fondin e bibliotekës.

Si pasojë e mjeteve të reduktura  financiare, nuk ka vazhduar aktiviteti i hulumtimeve në Kala, në qytetin mesjetar të Shasit, në lokalitetet Zogaj e Kërruç, por nuk janë siguruar mjete financiare  as për blerjen e titujve të rinj  të librave, aq të domosdoshme, për të pasuruar fondin e bibliotekës.

Mirëpo, duket shumë shqetësuese vërejtja që bëhet në raportin e punës së qendrës lidhur me gjendjen në të cilën ndodhen eksponatet muzeale. Për shkak të mungesës së mjeteve financiare nuk mund të bëhet konservimi i tyre i domosdoshëm. Në qendër po ashtu thonë se ata nuk mund të planifikojnë ndonjë veprimtari meqë mjetet financiare të cilat i ndan themeluesi janë të pamjaftueshme.

Këtu parashtrohet një pyetje shumë e thjeshtë: Qendra e Kulturës drejtohet dhe kontrollohet nga dy partitë të cilat e kanë pushtetin vendor edhe në aktivitetet e tyre partiake vazhdimisht angazhohen për një veprimtari më intensive dhe institucionale të kulturës. Është shumë e arsyeshme që, pikërisht, kjo qendër duhet të gëzojë një mbështetje më të madhe që të gjallërohet kultura publike, meqë kemi të bëjmë me një institucion buxhetor dhe bartës i kulturës në Ulqin. 

Në raportin e punës theksohet se ndarjet e pamjaftueshme financiare kanë filluar tash 4-5 vjet. Kjo gjendje ka arsye të analizohet se përse ndodh kështu: janë këto veprime subjektive apo objektive, apo themeluesi kërkon që mjetetet financiare t`u  dedikohen vetëm projekteve që duhet të realizohen edhe çmohen për rëndësinë e tyre.

Nëse qendra nuk është në gjendje të hartojë programe të këtilla, atëherë ajo edhe në këtë aspekt  duhet të ndihmohet, në mënyrë që të aftësohet dhe të sjellë risi edhe veprimtari që përkojnë me nivelin e sotëm kulturor e artistik, për të mos thënë edhe shkencor. Për shkak të mungesës së mjeteve financiare nuk hapet muzeu detar, nuk botohet libri i kumtesave  nga simpoziumi mbi detarinë e Ulqinit, i cili u mbajt vitin  e kaluar.

Nuk mund të mos përmendet as mbetja pezull e Shtëpisë së Kulturës, e filluar tash dy dekada. Në të, jo vetëm se është duke u vazhduar ndërtimi, por edhe ato pak investime të bëra pas vitit l997, të cilat këtu quhen të dyshimta, paraqet një vërejtje shumë të madhe për pushtetin vendor dhe atë republikan, sepse në zgjedhjet presidenciale të para katër vjetëve, qe premtuar se ky objekt aq i pritur edhe shumë i nevojshëm për Ulqinin, do të ndërtohet. Mirëpo, në vend se të ishte në funksion, edhe ata ndërtime jo cilësore që janë bërë, po dëmtohen edhe pasojat në këtë objekt duket se do të jenë tepër të mëdha.(Intron)

Ulqin, 5 dhjetor- Kryesia e Lidhjes Demokratike në Mal të Zi i bëri ftesë Partisë Demokratike të Socialistëve të Millo Gjukanoviqit për të  zhvilluar bisedime mbi gjendjen aktuale në Mal të Zi, e posaçërisht mbi pozitën e shqiptarëve si dhe mbi referendumin e paralajmëruar të statusit shtetëror-juridik të Malit të Zi.

Kryetari i Lidhjes Demokratike në Mal të Zi dhe deputet i kësaj partie, Mehmet Bardhi na informoi se kryesia e partisë që drejton ai ka konstatuar se gjendja status quo-  politike, shtetërore dhe juridike e Malit të Zi, sështë e papranueshme, jo vetëm se është zvarritur tash një kohë të gjatë, më shumë se një dhjetëvjetësh, por edhe për shkak se pamundëson zhvillimin e proceseve demokratike. Shqiptarët në Mal të Zi kanë mbetur  peng të një politike të partisë në pushtet, e cila nuk ka gatishmëri për të definuar qartë interesin e vet nacional shtetëror, e as statusin e popujve pakicë.

se shpejti do ta gjejm edhe nji foto teMehmet Bardhit

Definimi i statusit të shqiptarëve në Mal të Zi  duhet të rregullohet me kushtetutë, sepse kushtetua aktuale e Malit të Zi nuk i përmend me asnjë fjalë shqiptarët. Kryesia e LD në MZ konkludon se përmirësimi dhe avancimi  çështjes shqiptare në Mal të Zi duhet të bëhet në fushën përfaqësimit proporcional në organet republikane dhe lokale, i cili tash është i centralizuar nga Republika, sidomos të MPB, ku përfaqësimi i shqiptarëve është, të thuash, simbolik. Në këtë vazhdë përmendet edhe gjendja jo e mirë edhe në organet gjyqësore të Ulqinit.

Dihet mirëfilli se në komunën e Ulqinit në strukturën e përgjithshme të popullsisë, shqiptarët marrin pjesë me 8o për qind, kurse në organet e këtushme gjyqësore nga radhët e shqiptarëve nuk është as kryetari, as prokurori, kurse në Gjykatën e Lartë dhe atë Superiore nuk ka asnjë shqiptar.

LD në MZ në këtë dokument dërguar kreut të partisë në pushtet ka shtruar kërkesën e sigurimit dhe realizimit të administratës në gjuhën shqipe në ata teritore ku shqiptarët janë popull autokton. Ndërkaq, lidhur me arsimin kërkohet themelimi i një qendre rajonale për mbikqyrjen dhe përparimin e arsimit në gjuhën shqipe, sigurimi i inspektorëve, sepse tash ekziston vetëm një inspektor për shkollat shqipe në mbarë Malin e Zi, e po ashtu kërkohet të ndërpritet përvoja e deritashme që partia në pushtet, vetëm nga radhët e veta t`i emrojë drejtorët në shkollat shqipe.

Edhe me këtë akt LD në MZ kërkon nga partia e Gjukanoviqit njohjen e diplomave të të rinjve shqiptarë nga Mali i Zi, të cilët i kanë kryer studimet në Kosovë, Shqipëri e Tetovë. Rikthimi i statusit të komunë së Tuzit riaktualizohet përseri. LD në MZ në  këto përfundime  konstaton se “në fillim të viteve 6o-të është suspenduar në mënyrë arbitrare. Tuzi duhet të ketë status të ngjashëm me komunat tjera në Mal të Zi e jo në kuadër të bashkësisë së komunave të Podgoricës si kryeqytet, siç dëgjohen disa propozime jashtë partive shqiptare”.

Një pikë e veçantë  u kushtohet edhe marrëdhenieve me Shqipërinë. Në këtë kontekst kërkohet hapja e pikave të reja kufitare, siç është ajo në Sukubinë, komuna e Ulqinit, Hutaj-Krajë, në Liqenin e Shkodrës, Vermoshit në Plavë. Tash funksionon vetëm një pikë kufitare midis Malit të Zi dhe Shqipërisë, Bozhaj/Hani i Hotit. Në fushën e informimit publik kërkohet një kanal në TV dhe radistacioni publik lokal në Malësi me seli në Tuz, përfundimi i shtëpive të kulturës në Ulqin, Krajë e Tuz, hapja e maternitetit në Ulqin. Nga partia në pushtet kërkohet që organet kompetente të ndërmarrin masa energjike kundër tentimeve të përvehtësimit të objekteve të trashëgimisë kulturore që po bën Kisha Ortodokse Serbe në Krajë dhe në Kala të Ulqinit. Kërkohet po ashtu që pasuritë detare të kthehen nën ingerencat e komunave.

(Konferencë shtypi e Unionit Demokratik të Shqiptarëve) 

Ulqin, 4 dhjetor- Unioni Demokratik i Shqiptarëve në konferencën e sotme me gazetarë u prononcua rreth Propozimligjit mbi qeverisjen lokale në Mal të Zi.Kryetari i kësaj partie, Fuad Nimani tha se ky ligj nuk paraqet asnjë përmirësim të pozitës së pakicave, e veçmas të shqiptarëve .

Kryetari Nimani shtroi kërkesën që Ulqini duhet të gëzojë statusin e qytetit sepse, siç tha ai, këtë e meriton. Duke u mbështetur në këto karakteristika, kemi pritur edhe nga ekspertët ndërkombëtarë, perëndimorë, se këto veçori do të çmohen si kritere domethënëse, sepse faktet që ofron projektligji, që gjoja, numri i banorëve është ai që e definon statusin e qytetit, për ne nuk është meritore, tha lideri i UDSH dhe shtoi se nuk është as bindës  dhe e përjetojmë si diskriminim, të papëlqyeshëm dhe nuk është bindës.

Unioni Demokratik i Shqiptarëve ka pritur përmirësime ligjore edhe në planin e shfrytëzimit të të mirave natyrore dhe se me këtë ligj do të bëhet një hap cilësor, sidomos në komunat që shtrihn përgjatë  bregdetit, pra edhe të Ulqinit në shfrytëzimin e pasurive detare. Me këtë ligj komuna e Ulqinit është zhveshur nga të gjitha kompetencat edhe pse është fjala për pasuritë më kryesore të saj. Kemi pritur se do të bëhet decentralizimi dhe se këto të mira do të jenë nën mbikëqyrjen dhe kompetencën e drejtpërdrejt të komunave. Kjo është një padrejtësi, tha Nimani dhe shtoi se ligji nuk ka risi as në fushën e përdorimit të gjuhës dhe të shkrimit të pakicave, por ne mendojmë se është diskriminues  sepse me të parashihet masa  prej 2o për qind të mundësisë së pjesëmarrjes së pakicave në numrin e përgjithshëm të banorëve të komunës si cenzus për të pasur të drejtë pakica në përdorimin e gjuhës dhe të shkrimit të vet në tekstet e vulave. Së pari, kjo dispozitë është në kundërshti me dispozitat e kushtetutës.

Kryetari i UDSH-së foli edhe për policinë lokale që parasheh ky ligj. Me këto formulime ligjore nuk janë përmbushur kërkesat e partisë që drejtoj, që në polici komuna të ketë ndikim më të madh, qoftë në mbikëqyrjen e saj dhe në emrimin e shkarkimin e kuadrove më të larta drejtuese, pjesëmarrjen proporcionale të pakicave në polici, si dhe kompetencat që duhet të ketë kryetari i komunës në polici. Ai tha se kjo polici e cila propozohet me këtë ligj është kujdestari për pastrimin e qytetit e që nuk ka asgjë të përbashkët me funksionin që ushtron policia-, u shpreh kryetari i Unionit Demokratik të Shqiptarëve, Fuad Nimani për Propozimligjin mbi qeverisjen lokale në Mal të Zi. (Intron)

Ulqin, 3 dhjetor-Si resurse natyrore me shumë perspektivë deri vonë janë llogaritur turizmi dhe bujqësia sepse territori i komunës së Ulqiit ka kushte jashtëzakonisht të favorshme për kultivimni e drithërave, gjithësesi më të mirat në mbarë bregdetin e Adriatikut, e sidomos të grurit. Mirëpo, viteve të fundit, e kjo u pa sivjet, se është hequr dorë nga kjo kulturë bujqësore. Përse ka ndodhur kështu, inxhenieri Gani Rexha, këshilltar për bujqësi pranë Kuvendit të Komunës së Ulqinit thekson se është e vërtet se kjo komunë ka potenciale të mëdha tokësore dhe kuadro për kultivimin e grurit. Viteve të fundit kanë hequr dorë banorët prej tij, mund të shihet shumë rrallë, në mënyrë simbolike në fushat e Ulqinit.

Është fakt se më heret ka qenë kultura dominuese e drithërave të bardha. Në kohën e njëpartizmit kultivimi i grurit këtu ka qenë detyrë partiake. Atëherë ekzistonte edhe një organizatë bujqësore e nivelit komunal që merrej me çështjen e grurit. Kishte edhe mekanizëm bujqësor për aplikimin e masave agroteknike edhe kishte mundësi për të shërbyer edhe sektorin individual. Më atë kohë nuk kishin depërtuar në masë të duhur varietet e pemëve mesadhetare, mjaft profitabile, siç janë agrumet dhe në përgjithësi ato që rriten në viset jugore. Me paraqitjen e agrumeve, si pemë që sjell fitime, ndikoi që bujqit të braktisin kulturën e grurit. Z. Rexha thotë se në zonat e Ulqinit nuk jep rendimente të kënaqshme, nuk është profitabil edhe mund të konsiderohet se është shkaku kryesor që bujqit të përqafojnë ndonjë kulturë tjetër bujqësore.

AGRUMET –PEMËT MË ME PERSPEKTIVË

Përballë kësaj, në treg shitet gruri dhe nën prodhimet e tij shiten me çmime të leverdishme dhe detyrimisht nuk ekziston llogaria që të mbjellin atë. Sejcili nga bujqit synon që mundi dhe djersa e tij të shoqërohet me ndonjë prodhimtari që sjell më shumë të ardhura ekonomike. Përballë kësaj është i pranishëm një ekspansion i vërtet i kultivimit të pemëve mesdhetare frutore, posaçërisht agrume dhe perimeve, në veçanti ato që prodhohen heret në pranverë nën leje të ngrohta.

Në pyetjen tonë se a ka pasur sivjet  bujq të interesuar për të mbjellur grur dhe a  ekziston  forma stimuluese nga ministria e Bujqësisë  për ata që shfaqin interes për të mbjellur grur, shërbimit tonë sivjet i është lajmëruar një numër shumë i vogël bujqish, të cilët kanë shfaqur dëshirën për të mbjellur grur në mënyrë që t`u siguruar farën e grurit.

Konsideroj se njeri ndër shkaqet që ndikon në rendimentet e ulëta, janë pikërisht varietet e grurit që prodhohen në institute ku më shjumë dedikohen për zonat me klimë kontinentale se sa kësaj që e kemi na, mesdhetare. Ministria e Bujqësisë jep mjete të konsiderueshme për stimulimin e bujqve, por jo edhe masa nxitëse për kultivimin e grurit. Siç dihet, më parë gruri është mbjellur në rajonin  e Shtojit  dhe Fushës së Ulqinit, kurse sivjet janë disa sipërfaqe të vogla në Anë të Malit dhe në Zogaj. Unë nuk do t`u kisha rekomanduar banorëve të Ulqinit që të heqin dorë përfundimisht nga mbjellja e kulturës së grurit, por jemi një rajon specifik. Pemët frutore, e në veçanti agrumet kanë ndikuar që të mos mbillet më gruri si dikur me urdhër të partisë. Është normale që rajoni i komunës së Ulqinit të orientohet në kulturat më të suksesshme bujqësore.
 

Ulqin, 2 dhjetor- Se këtë qytet e ka mbuluar amullia e dimrit, dëshmon edhe fakti se nuk  jepet asnjë shfaqje publike të  filmit. Në qendrën e këtushme të kulturës thonë se, përsa i përket punës së kinemasë, si formë e veprimtaraisë së përgjithshme të kulturës, theksojnë se kjo njësi organizative dhe vet qyteti i Ulqinit nuk ka kushte hapsinore e as teknike për të riorganizuar atë. Objekti i sallës së kinemasë në qytet dhe ai në Ranë, e ashtuquajtura kinobahçe janë amortizuar tej mase dhe ndodhen jashtë funksionit.

  Ndërtesat dhe inventari janë që  nga viti l956 përkatësisht l959, por edhe kinemaja e Ulqinit  po përjeton fatin e simotrave në mjediset tjera  sepse, sipas Qendrës së Kulturës në Ulqin, është viktimë e videoproduksionit.

Megjithatë, banorët e këtij qytetit mendojnë ndryshe, sidomos të rinjtë të cilët thonë se janë shumë të interesuar për të parë një film në ekranin e madh. Qendra e Kulturës këtë duhet ta shqyrtojë. Me këtë gjallërohet një segment kulturor, gjithësesi, më mirë se sa objektet të mbesin edhe tutje të mbyllura. (Intron)

Ulqin, 2 dhjetor-Kjo pyetje dëgjohet për çdo mëngjes aty në qendër të qytetit. Të rinj, nga vise të ndryshme të vendeve ballkanike, e më së shumti nga Kosova, Serbia, Shqipëria gudullisin sytë në drejtim të çdo kalimtari për të gjetur ndnjë punë fizike. Të shumtën punë gjendet në ndërtimtari, pastrimin e ullinjve, zabeleve, arave, ngarkim –shkarkime etj. Mëditjet sillen prej 2o deri në 3o marka gjermane, varësisht nga punët që bëhen. Mirëpo, që të gjithë ata që kërkojnë punë janë të moshës së re, rëndom 2o deri në 35 –vjeçare. Të rrallë janë ata që zotërojnë ndonjë mjeshtri, që të gjithë janë punëtorë krahu.

Në bisedë me disa prej tyre mësojmë se nuk ka punë regullisht, mbase çdo të dytën apo të tretën ditë mund të gjendet ndonjë punë. Kur llogariten shpenzimet –qiraja e banesës, ushqimi, mjetet e higjenës, arrihet të mbijetohet vetëm për bukën e gojës, por shumica e tyre kanë ardhur në Ulqin, duke shpresuar se do të jetë ndryshe, do të ketë punë edhe që paguhet mirë mundi.

-Kam ardhur nga Puka. Një kohë të gjatë kam punuar në arsim, por me ato të ardhura nuk mund të jetohet. Në Tiranë kam djalin student edhe nevoja më ka shtyer që të vij në Ulqin për të kërkuar punë. Normalisht se e kam një moshë të thellë edhe vështirë mund të binden njerëzit se unë jam murator i mirë, instalues i rrymës, i ujit etj. por duhet të njohësh njerëzit për të dhënë punë. Tash një javë bredh poshtë e lartë edhe ende nuk jam angazhuar. Nuk kam rrugëdalje tjetër, pos të kthehem në Pukë, por lekët që i kisha në xhep i shpenzova. Në shtëpi presin  që të shkoj me para. Kohë të vështira janë këto, thotë bashkëbiseduesi ynë nga Puka, i cili ia mësy Ulqinit për të gjetur punë, por më kot ka kërkuar një javë.
Nuk është rasti i vetëm pukjani. (Intron)

Ulqin, 2 dhjetor- Kodrat e gjelbruara nuk joshin vetëm syrin, por jane edhe oazë që fisnikëron në disa ambiente që rrezikohen nga reparte të ndryshme indistriale apo objekte turistike. Derisa Pylli i Pishnjave që ndodhet midis hotelit “Albatros” e “Galeb” është i rrezikuar nga mbeturinat turistike, verore, pishnajat në Mal të Bardhë po shkatërrohen nga ndërtime të shumta të shtëpive private, të cilat janë duke u paraqitur si “këpurdhat pas shiut”. Krahas mullirit të gurit dhe ndërmarrjes ndërtimore, kjo është edhe një goditje e rëndë ndaj këtyre drunjve, të cilat janë mbjellur, diku në vitet e para pas Luftës së Dytë Botërore.

 

Ulqin, l dhjetor-Të rinjtë e këtij qyteti, por jo vetëm ata, këto ditë janë hedhur në një “sulm” për të kërkuar fatin e tyre nëpër bastoret sportive. Deponohen paratë e fundit në tiketat sportive me dëshirë që të fitohet ndonjë para në këtë mënyrë. Në Ulqin ndodhen 4- 5 bastore të kësaj natyre edhe, relativisht, janë të vizituara të shtunave, në veçanti. ”Ethet” vazhdojnë tërë ditën edhe natën, duke pritur “shumat” e ëndërruara. Të shumtën e rasteve iluzionet për të fituar pa mund e pa djersë shkojnë huq, zhgënjime janë të pafund. Dikush ka pasur shpresë se do të ketë të qëlluara të  gjitha rezulatet e përzgjedhura, por për një çast edhe në minutat e fundit është shënuar gol nga skuadra që nuk është pritur.

 Atëherë, detyrimisht, pëlcasin nervat edhe duhet pasur kujdes nëpër rrugët e Ulqinit, që të jesh sa më tolerant ndaj atyre me shpresa të thyera nga bastoret sportive. Mirëpo, dikush mund të fitojë, madje, qëllon edhe shuma të mëdha edhe përseri ndezen pasionet për të deponuar në tiketa të reja edhe duke e ndërruar bastoren, sepse mund të sjellë fat. Kësisoj, bastoret sportive në Ulqin, bëhen lokalet më të frekuentuara nga të rinjtë të cilët përpiqen që të fitojnë një phening në këtë mënyrë sepse punë tjetër vështirë se vendosin të prekin me dorë, ta zëmë në ndërtimitari ose të ngjashme edhe të hiqet dorë nga kjo mënyrë e “pasurimit” të menjëhershëm. Vërtet se kjo dukuri nuk është vetëm në Ulqin, por edhe në katundet e kësaj komune, në Krajë, Tuz etj. e lëre më në mjediset tjera në Mal të Zi. Kjo formë e kërkimit të fatit në vendet e ish-kampit socialist arrin efekt tejet negativ te brezi i ri, sepse ëndërron që me dy markë të fitojë shuma kolosale për të zgjidhur gjendjen financiare për disa vite! Dikush mbase e llogarit këtë edhe si argëtim, duke mos llogaritur se ka hyrë në një botë që sjell vetëm shqetësime edhe bastardhim. E gjithë kjo ndodh nga mungesa e përkujdesjes së shoqërisë për të shpëtuar rininë nga rruga. (Intron)

Ulqin, 1 dhjetor-Qyteti i Ulqinit ka pak hapësira të gjelbërta. Edhe ato që janë e kanë humbur imazhin dhe funksionin  e tyre. Lulishtet e dikurshme në Ranë, nuk ekzistojnë më, sepse mbi to janë ngritur qoshqe dhe objekte të ndryshme tregtare dhe turistike-hoteliere. Derisa këtu ndodheshin të dëbuarit shqiptarë të Kosovës, l998, l999,kanë vepruar edhe disa organizata humanitare ambientaliste.

Në foto:Bukurinë e Ulqinit nuk e përbëjnë vetëm ndërtesat e larta

Ato kanë zhvilluar disa projekte për pastrimin e rrugëve dhe trotuarëve të lagjave të Ulqinit.  Mirëpo, ato kanë shkluar edhe përseri disa nga rrugët, madje edhe ajo që shpie nga qyteti për në Plazh të Madh, janë mbuluar nga manaferrat. Mirëpo, kështu nuk është para pallateve të banesave të solidariteti, atyre të “Igmanit”. Banuesit e tyre kanë bërë investime të vogla, duke rregulluar hapësirat para atyre objekteve. Vizituesit kanë kënaqësi të shohin këto ditë oborret e mbjella me bar “ anglez”, palma dhe pishnaja...Kalimtarët e rastit apo banorët e “padishiplinuar” e përfillin edhe janë adaptuar me këto stoli të qytetarisë.

Mirëpo, kështu nuk është para të gjitha pallateve të banesave në Ulqin, as para ndërtesës së Kuvendit të Komunës, Shtëpisë së Shëndetit edhe Qendrës shkollore. Përjashtim bëjnë hapësirat e kafiterive përballë Qendrës shkollore. Ato, në vend të tendave që më parë kishin zënë edhe trotuarin, edhe inspektori komunal me një urdhëresë i largoi, hapësirat u gjelbëruan. (Intron)

Ulqin, 1 dhjetor-Edhe pse zgjedhjet e përgjithshme në Mal të Zi janë zhvilluar që në fund të prillit të kaluar, duke shikuar afishet dhe “mesazhet” partiake edhe në Ulqin, thua se ato duhet të mbahen së shpejti sepse këto “gjurmë” kanë mbatur të pashlyera nga muret e ndërtesave dhe rrethojave të ndryshme. Edhe pse me ligj ishte e ndaluar të shkruhen këso “porosi” ideologjike, megjithatë nuk u respektua kjo normë.

 Ato nuk janë vetëm zemruese, por edhe të vrasin syrin e çdo kalimtari sepse nuk paraqesin asnjë vlerë, duhet të pastrohen për të rikthyer pamjet paraprake që kishin dizajnet e ndërtesave dhe objekteve të tjera të cilat janë shfrytëzuar për të reklamuar zhurmën e partive politike. Në vend se të zhvillohet ndonjë projekt ekologjik apo kulturor, ”ekspozitat” e mesazheve partiake kanë mbetur sot e gjithë ditën nëpër Ulqin.